ATIA ta reacciona riba accion di douaneronan:
ORANJESTAD (AAN): Aruba Trade & Industry Association (ATIA) a tuma nota cu e douaneronan a pone trabou abao pa algun mainta caba. Nan rason ta pa nan cobra nan oranan bek.
Director di ATIA a purba tuma contacto cu Sr. R. Croes, pero no a haya comunicacion cu ne. E Douaneronan ta tumando 8 ora bek pa siman, pa compensa pa e recorte di 12.6%. Un recorte di 12.6% ta igual na 1 ora pa dia, cu ta 5 ora pa siman y no e 8 ora nan cu ta wordo tuma inhustamente.
ATIA ta di opinion cu tuma ora bek no ta e solucion paso ta perhudicando comercio y e ciudadanonan di Aruba.
ATIA ta compronde e situacion, pero poniendo trabou abou na nu manera asina, ta perhudica henter comercio. Pueblo mester corda bon cu tur producto cu ta bin Aruba ta wordo importa, y ta e douaneronan tin cu aproba y verifica pa por saca e productonan di e containers. Mas largo e containernan cu mercancia aden keda para, mas gasto pa e importadornan y mas e prijs pa producto nan lo subi pa pueblo.
Alaves, un accion asina por crea scarcedad pa e wholesalers paso nan no ta haya nan productonan na ora, cu ta causa cu no por entrega mercancia den nos tienda, supermercadonan y horeca na ora pa pueblo por sobrevivi y turistanan por gosa di nos isla.
Pa e rasonnan aki ATIA ta considera e accion aki manera uno cu ta corta e “ader principal di nos Economia” y asina tambe trancando e recuperacion di Aruba especialmente awo cu economia finalmente ta completamente habri.
