Nicolas Maduro semper a considera Aruba parti legitmo di Venezuela --- *For di 2018 Maduro a cambia Venezuela den centro di paisnan peligroso --- *Sosten Hulandes pa armamento Ukraine contra Putin cu no por hala atras
ORANJESTAD(AAN)—“Tin motibo pa Aruba keda alerta den e situacion mundial nobo cu a presenta. Na e momentonan aki Rusia claramente ta duna prueba cu e no ta hala atras manera a pensa y ta dispuesto pa yega na un confrontacion nuclear.”
Palabranan di expertonan clave na DIARIO mientras mundo ta experencia uno di e menasanan mas serio cu el a comoce pa un guera mundial.
Pakico un guera na Ukraine ta contene un menasa serio pa Aruba, mas y mas ta bini dilanti den informacion cu DIARIO ta ricibi di diferente parti di mundo, cu ta indica na prome lugar cu mester tene na consideracion cu den e confrontacion actual, Vladimir Putin no por hala atras.
Vladimir Putin ta un dictador cu ta dicidi pa Rusia cu no ta un pais democratico. Putin ta dicidi pa Rusia y si Putin faya, e ta den un problema serio na Rusia.
Mescos ta e realidad di Nicolas Maduro, e persona cu Putin a tene na mando na Venezuela.
“E regimen di Nicolas Maduro a conoce su momento culminante na 2018 ora hasta Operacion Puma lo a wordo prepara pa pone un fin na e dictadura di Nicolas Maduro,” informantenan a trece dilanti.
Awe e Operacion Puma ta wordo discuti entre Nicolas Maduro y e gobernantenan socialista nobo di Argentina, cu no ta di acuerdo cu e politica cu e gobierno democratico anterior di Argentina a hiba.
Manera DIARIO a splica for di ayera, Rusia a inverti den conkista di e continente Latino Americano y Venezuela ta un ehempel pasobra ta placa di Rusia tin Nicolas Maduro y otro dirigentenan Comunista na poder.
Informantenan a indica na DIARIO, cu Nicolas Maduro a transforma economia di Venezuela den un asunto di paisnan conoci como subversivo na mundo.
Paisnan cu ta wordo considera “peligroso” a hinca placa den economia di Venezuela cu ta haya sosten di tur nacion cu ta mara na Rusia.
Como ehempel a bini dilanti e forma cu “Rusia Blanco” manera Belarus ta wordo yama, a bira participante importante pa rebiba e economia Venezolano cu produccion di vehiculonan industrial y pa agricultura.
Belarus ta den e region imediato di Ukraine y Rusia y tambe ta wordo dirigi a base di dictadura.
Informantenan a mustra cu nunca Nicolas Maduro a kita bista for di Aruba, cu e ta considera como parti di Venezuela manera publicamente semper el a expresa.
Con facil Venezuela por yega Aruba, ta keda demostra den e hecho cu hasta por landa entre e dos paisnan.
Continuamente tur tipo di embarcacion procedente di Venezuela ta den vecindario directo di Aruba, cu ta parti di Reino, loke ta hiba na otro asunto cu Aruba mester tene na consideracion.
Reino Hulandes ta sostene Ukraine abiertamente contra Rusia. Esaki a bini dilanti den e hecho cu Reino Hulandes a manda ekipo militar pa Ukraine hunto cu material pa e poblacion di Ukraine por cuida nan mes den un atake di parti di Rusia.
Informacionnan ta indica cu Reino Hulandes tambe ta tene na consideracion e menasanan serio di Rusia di uza arma nuclear den e confrontacion serio, cu no a termina manera mundo a spera.
Siman ta cera cu un mundo den suspenso y un escalacion den e crisis di Ukraine, mientras paisnan ta dicidi con nan posiciona nan mes den e confrontacion mas serio cu mundo a conoce for di e supuesto final di guera friu.
Aruba ta pais den Reino pero tambe obhetiva sigur di e poder di Nicolas Maduro, cu ta uza e mes base cu Rusia ta uza pa reclama Ukraine.
Segun Nicolas Maduro, Aruba mester ta parti di Venezuela, cu na e momentonan aki ta aliado y centro economico, financiero y militar di paisnan cu Aruba, Reino Hulandes y mundo liber ta considera como peligroso y cu Merca ta considera peligroso.
