Parlamentario Gino Goeloe:
ORANJESTAD (AAN): Parlamentario di Fraccion di AVP, Gino Goeloe den un entrevista recien cu DIARIO a splica riba e desaroyonan na Hospital. Como Presidente di Comision di Salud, el a indica cu e ta sigui e asunto aki hopi di cerca.
Señor Goeloe a remarca cu desde cu e tabata Presidente di Raad van Toezicht di Hospital for di 2014 pa 2020, e problema aki a surgi, na unda Hospital tabata haya hopi pashent ilegal y turistanan na Eerste Hulp pa nan haya nan ayudo medico. For di e tempo ey e problema a sigui crece, segun Goeloe, esaki tabata loke el a premira tambe.
“E 27.2 miyon aki no ta algo di awe pa mayan. Ta algo cu a crece pa aña, desde 2014”, Goeloe a duna di conoce.
Prome cu esey caba, el a remarca, tabatin cifranan cu tabata indica cu e ilegalidad na Aruba ta creciendo y nan tambe ta haci uzo di servicio medico y no por nenga nan.
“Bo no por nenga niun pashent, ni ilegal ni turista, niun hende, pa duna nan servicio medico pasobra nos ta cay bou di e tratado di Nacionnan Uni, e parti humanitario. Esaki ta un discusion cu nos lo tin pa hiba na Aruba pa haya un indicacion con leu nos mester bay”, Goeloe a enfatisa.
E parlamentario a remarca cu for di e tempo ey caba, como Presidente di Raad van Toezicht, el a manda carta na e ministernan concerni, pero lamentablemente no tabatin oido. El a subraya cu a bin cu e proposicion pa ATA conhuntamente cu Gobierno y Airport, cobra un fee di 10 of 20 dollar na turista, como parti di un seguro medico, pa cubri gastonan medico ora cu turistanan no tin fondo pa paga.
E parlamentario a agrega cu den su periodo unda el a presidi Raad van Toezicht, tabatin difrente caso unda turistanan a bira malo, AZV of Hospital a cubri e gastonan aki, sinembargo, ora di bay cobra nan bek, nan no tawatin e fondo.
E situacion actual unda cu personanan cu no tin seguro medico of fondo pa paga cuido medico na Hospital, no ta un problema nobo. Aruba mester finalmente determina con lo atende e gasto aki di un manera sostenibel. Parlamentario Goeloe a enfatisa cu e discusion mester continua, teniendo na cuenta tanto e obligacion humanitario pa brinda cuido medico como e impacto financiero cu esaki ta ocasiona pa Hospital y e sistema di salud di Aruba.
