Na Aruba no tin animalnan portador di Hantavirus
Posibilidad di transmision local ta wordo considera hopi abou
ORANJESTAD (AAN): Directie Volksgezondheid (DVG) a tuma nota di e noticia internacional tocante fayecimento di tres persona den estado Anzoátegui na Venezuela, despues cu autoridadnan oficial di salubridad di e pais a confirma cu e personanan aki tabata infecta cu Hantavirus.
A base di informacionnan colecta, actualmente e situacion na Venezuela no ta representa un riesgo directo pa Aruba.
Hantavirus ta den mayoria casonan un zoonosis, un enfermedad cu ta wordo transmiti di animal pa hende, principalmente door di contacto cu orina, feces of saliva di cierto tipo di raton silvestre y otro animalnan portador di e virus. Segun informacion oficial, no tin evidencia cu e casonan actual na Venezuela ta encera transmision di hende pa hende.
Na Aruba no tin animalnan portador di Hantavirus. Pa e motibo aki cu posibilidad di transmision local ta wordo considera hopi abou.
DVG ta sigui monitor e situacion di cerca y si evaluacion di riesgo cambia pa Aruba, lo tuma medidanan necesario pa proteha salud publico y informa comunidad debidamente.
