Pasobra bo salud ta nos prioridad
ORANJESTAD (AAN): Nos oido ta sumamante importante pa nos salud general y nos funccionamento diario. Hopi no ta realisa su importancia te ora cu nan cuminsa tuma nota di perdida di nan oido. E lamentable ta cu unabez nos perde parti di nos oido, esaki nos no por recupera mas. P’esey ta importante pa nos proteha esaki ora nos tin e y si acaso tin hende a perde cierto parti di nan abilidad pa scucha bon, ta importante pa nos cuida loke nos a resta of tin ainda.
Tur aña di nobo durante temporada di Carnaval e topico aki ta bin na vigor. E pregunta cu ta wordo haci continuamente ta; kico of cuanto ta un zonido responsabel cu ta contribui na conserva y perserva e oido di tanto participantenan pero tambe musiconan, espectadornan y esnan trahando durante e evento musical?
Den cuadro di salud, DVG riba dia 24 di januari 2025 a publica den Landscourant van Aruba un linea di maneho pa cu eventonan musical. Un linea di maneho compila cu ayudo di diferente stakeholder. E linea di maneho aki ta duna conseho riba e topico di zonido den eventonan musical manera entre otro Carnaval y Concierto, sea den espacio interior of exterior. Ta e meta cu e linea di maneho aki den futuro lo forma e base pa cu cumplimento di e ley “Hinderlijke geluidenverordening”.
Maneho interior cera; pa cu e temporada di Carnaval e linea di maneho aki ta duna como conseho pa mantene zonido den un espacio interior cera te na un maximo di 90db midiendo esaki para entre e comienso di e cenario (stage) te cu mas leu unda publico por para.
Maneho interior den aire liber, pa eventonan interior den aire liber (jump in) e conseho ta pa mantene e cantidad di zonido na un maximo di 100db te cu 12:00 am y despues di 12:00 am te na un maximo di 95db midiendo esaki para pafo na e ‘grens’ di e localidad. E diferencia den db cu ta cambia den cuadro di e orario ta relaciona cu e maneho di Hinderlijk geluidenverordening di 1998.
Parada di Carnaval; pa locual ta e conseho cu DVG ta duna pa cu maneho di zonido durante parada di Carnaval esaki ta maximo 90db midiendo esaki para na un distancia di 10 meter for di e speakernan cu ta produci e zonido.
Añanan anterior durante midimentonan di zonido cu a tuma lugar durante parada di Carnaval, DVG a midi cerca algun banda musical un maximo di 115db cu ta un zonido cu no solamente ta causa daña na oido di hende pero ta asta desregula e latido di curazon di un persona, ocaciona stress y iritacion.
E linea di maneho aki cu DVG a produci ta pa duna un guia na entre otro companianan di zonido y nan tecniconan pa contribui na salud di e oido di nos tur.
Pa por ricibi mas informacion riba e linea di maneho aki cu ta hiba e nomber ‘Richtlijn Hinderlijke Geluidsnormen voor Muziekevenementen’ por subi e website di DVG y bou di e seccion investigacion/anuncio lo por download e documento aki completo.
