ORANJESTAD (AAN): Directiva di La Salle College MAVO na Playa, a emiti un boletin Diabierna atardi laat, cu full e edificio di scol lo bay ta cera e siman aki.
La Salle College lo bay ta completamente cera henter e siman aki. Pues te otro siman 10 di Mei 2021, scol lo habri bek.
Como cu awe Dialuna ta un dia liber caba, esey nifica cu oficialmente nan lo ta cera di 4 Mei te cu 7 di Mei 2021.
Directiva a splica cu motibo di esaki ta cu e Departamento di Salubridad Publico DVG a stipula cu un gran parti di e personal di scol tin di drenta cuarentena preventivo.
“Nos ta pidi mayor- y alumnonan pa durante cu scol ta cera, pa bishita e plataformanan di Facebook, Google Classroom, y email di scol frecuentemente. Pa motibo cu alumnonan por ricibi diferente informacion importante via e plataformanan aki,” e boletin firma pa Director I. Davelaar a indica.
“Si mayornan ainda no tin acceso na un di e plataformanan aki, por tuma contacto cu mentor di e alumno.
EXAMEN DEN PORTA: Algo cu directiva di La Salle College MAVO a tene hopi na cuenta cune, ta cu e periodo di Examen 2020-2021 ta den porta.
“E periodo di examen ta cuminza Dialuna 17 di Mei 2021. Un peticion special ta bay na nos examenkandidaten pa haci bon uso di e tempo aki pa prepara pa e periodo di Examen Final.”
Tur alumno mester ta na scol bek riba Dialuna 10 di Mei 2021.
