Segun Director di WEB Aruba NV - *Pa 5:15 am di diadomingo Aruba completo tabata bek cu coriente
ORANJESTAD (AAN): Director di WEB Aruba NV, Luis Oduber a duna di conoce diadomingo atardi durante un conferencia di prensa extraordinario cu diasabra na momento cu Aruba a bay den un 'blackout' completo pa 6:24 pm, na WEB tambe tur cos a bay abao.
Cierto ekiponan, cu ta sistemanan di 'backup', entre otro sistema di computacion y algun ekipo critico cu ta e unico cu tabata tin coriente.
Den un caso asina, a splica, mester purba isola pa haya sa unda e problema ta y pa purba trece e coriente bek.
Tabata un situacion interno critico pasobra tabata birando scur tambe.
Pa 7:15 pm a start e prome motor internamente. Esey tabata pa por a sigui traha den manera interno, a señala.
Siguientemente a start a gas turbine y na e momentonan ey, conhuntamente cu NV Elmar, cu tambe a keda traha te laat pa purba resolve e problema.
E manera pa purba restablece coriente bek na pueblo a bay poco poco. Door cu e problema a mustra di a inicia na e boilernan, a tuma e decision pa 'start-up' riba e motornan so mientras cu tabata purba resolve e problemanan cu a sosode na e boilernan, Oduber a indica.
Asina poco poco a inicia e motor y cuminsa suministra coriente bek. Entre 7:30 pm pa 8 pm a cuminsa suministra coriente pa algun bario. Esaki a sosode conhuntamente cu Elmar, a remarca.
Poco poco a cuminsa duna e barionan coriente y a logra cu tur e motornan tabata ariba cu excepcion di dos ya cu un motor ta den mantencion y un otro cu tabata duna problema. Pero dado momento tabata tin tur turbina riba linea y e motornan disponibel na e momento ey cu a suministra coriente na un parti di Aruba.
A agrega cu mester a bay over na pone traha e boilernan bek. E boilernan ta un proceso. Ora cu nan ta cayente nan ta bay mas lihe. Tabata tin retonan tambe pasobra e boiler mester tin hopi control riba dje y no por hisa un boiler su so. Mester cuminsa cu un turbina tambe y e proceso ta bay balansa entre boiler y turbina.
Durante e proceso aki tambe a topa algun dificultad cu a haci cu e proceso a tarda. "Lamentablemente el a tarda hopi. Nos ta pidi disculpa un biaha mas pa esey. Pero tabata challengenan cu tin pa pone nan ariba", a enfatisa.
E boiler cu inicialmente a duna indicacion di tin problema, no a purba di reinicia na e momento ey. A keda dos otro boiler y cu esey a start un pa un cu tur e retonan, Luis Oduber a bisa.
Asina poco poco a restablece coriente y conhuntamente cu Elmar tambe a topa cu algun problema. Elmar a haya problema cu e sub-stacion na Sabana Blanco cu e breaker cu no kier a cera. Pesey Oranjestad ta e ultimo cu a haya coriente bek.
Tin cabelnan cu a haya un sobrecarga y esey a trece tin biaha cu coriente por a bin na un bario y bolbe bay. Pa 5:15 am di diadomingo, Aruba tabata completamente suministra bek cu coriente, e director di WEB Aruba NV a declara.
