Durante Justitieel Vierpartijenoverleg a fortalece lasonan den Reino

ORANJESTAD (AAN): Diahuebs 19 di juni, a tuma luga e Justitieel Vierpartijenoverleg den e Ballroom di Embassy Suites na Aruba.

E reunion ta un encuentro strategico entre e ministerionan di Husticia di Aruba, Corsow, Sint Maarten y Hulanda, pa trata topiconan comun riba nivel hudicial.

            Mainta a consisti di un prome sesion riba nivel ambtelijk den cual esnan na cabes di e institutonan clave den e cadena hudicial di e paisnan ruman a intercambia conocemento tecnico riba un variedad di tema di interes regional. E dialogo a forma un base solido pa futuro desaroyo di cooperacion efectivo den Reino.

            Mirando cu Gobierno Hulandes ta demisionario, e Minister di Husticia di Hulanda, sr. David van Weel, no a alcansa pa asisti personalmente na e reunion di atardi, pa cual a tuma luga un reunion tripartite entre Minister di Husticia di Aruba, mr. drs. Arthur Dowers, Minister di Husticia di Sint Maarten, mr. Nathalie Tackling, y Minister di Husticia di Corsow, mr. Shalten Hato. Durante di e tripartite a dialoga riba temanan manera criminalidad entre hobennan, posicion y violencia cu arma entre hobennan y violencia cu arma na nivel regional. Ademas a dialoga riba e retonan cu personanan indocumenta, cual tur tres pais ta alinea cu e necesidad pa un maneho nobo pa yuda elimina entre otro abuso laboral di esnan sin status legal.

            Minister Dowers a enfatisa cu aunke husticia ta un asunto nacional, e cooperacion boluntario den Reino ta necesario pa atende desafionan comun. Ta importante pa traha hunto pa proteha e estado di derecho di cada pais den Reino, fortalece nos institucionnan y duna confiansa den nos sistema hudicial.

            Corte di Husticia ta un di e aspectonan den husticia, como entidad funcional pa tur pais den e region, ta fundamental pa garantisa un rechtzekerheid cu ta duna confiansa, incluso pa inversionistanan internacional. Tambe den e ehecucion di ley (rechtshandhaving), ta esencial cu tin cooperacion interinsular entre Cuerpo Policial, Kustwacht y otro instancia pa proteha nos frontera y teritorio maritimo.

            Pa enfrenta e reto regional, Minister Dowers a enfatisa cu den e tipo di dialogo asina, mester yega na palabracion concreto. Desde 10-10-10, cu Boneiro, Saba y Sint Eustatius ta parti di Hulanda, e responsabilidad di Hulanda den region a crece. Ta importante cu awo realmente Hulanda ta compronde e reto regional cu e otro islanan tin añas ta enfrenta.

            "Mester keda inverti den e aspecto humano y ta sinti cu tin boluntad cerca e partnernan di Sint Maarten, Corsow y Hulanda", Minister Dowers a expresa. 

            E proximo Justitieel Vierpartijenoverleg ta planea pa tuma luga na Sint Maarten den cual ta spera cu por conta cu participacion di Hulanda, pa continua e dialogo y concretisa acuerdonan riba nivel di husticia. Minister Tackling a compromete pa fortalece cooperacion entre e islanan ruman pa combati e desafionan cu ta enfrenta den region.