Di aki e importancia di e acuerdo firma cu AH&SF
ORANJESTAD (AAN)- CEO di Aruba Tourism Authority (ATA), Ronella Croes, den conferencia di prensa a reitera e importancia di e Diamars cu a pasa den e contexto di e acuerdo cu a firma cu Aruba Hospitality & Security Foundation (AH&SF).
Croes a bolbe pone den contexto cu Aruba, segun proyeccionnan, ta bay haya un total di 1.1 miyon bishitante, cu lo bin Aruba cu avion, y banda di esaki tin mas of menos siete mil bishitante cu lo bin cu barco. El a bisa cu si durante e temporada halto di turismo, ta wordo inclui e fluho di bishitantenan di barco y, den un luna, Aruba por ta sperando 200 mil bishitante riba nos Isla, banda di e populacion.
“Pues, ta un cantidad grandi di hende cu ta bishita nos pais, y aki ta bin e importancia di e fundeshi di nos turismo. Nos turismo ta consisti di tres aspecto cu nos no por neglisha na ningun momento; un di nan ta e seguridad y cune e trankilidad cu nos ta brinda nos bishitantenan y tambe nos populacion. Di otro banda tin nos playanan, nan calidad, y sin lubida nos hospitalidad y cordialidad”, Ronella Croes a señala.
El a reitera cu e tres aspectonan aki ta e fundeshi di Aruba su turismo y e producto cu nos ta exporta, y pa cual hopi ta scoge Aruba.
“Pues pa nos ta esencial, naturalmente, pa pone enfoke riba nos seguridad cu ta wordo brinda na e bishitantenan. Na aña 2001, AHATA a institui como tal ‘Aruba Hospitality & Security Foundation’ y desde e momento ey, diferente organizacion ta forma parti di e fundacion aki”, CEO di ATA a relata, y na 2011 ATA a tuma na su encargo e financiamento di e fundacion aki y tur e actividadnan.
