Durante añanan ta existi e necesidad di un centro di guia pa studiantenan

Directora suplente di D.E.A:

*Cu tin cu scoge pa un carera y un pais pa studia 

ORANJESTAD (AAN)-- Sheila Maduro, Directora Suplente di Departamento di Enseñansa (D.E.A), tambe a hiba palabra durante e acto di apertura oficial di e Oficina Studio y EducationUSA, na Zoutmanstraat-1.

Señora Maduro a menciona, pa cuminza, cu 31 aña pasa su persona a wordo yama pa dirigi un centro pa studiantenan. El a haci e trabao aki, cu hopi amor, pa ocho aña largo, y despues di esey el a bay den exterior, y enberdad e parti di guia a cay hunto cu e parti di studielening.

“Pero durante e añanan mi a tende tambe hopi riba e necesidad di e studiantenan dirigi riba e parti di guia.

Guia ta necesario, y mi ta contento cu Minister Croes a bin cu ‘Bay Studia’. Ami ta mescos cu ‘pasado ta topa presente’ y mi a conoce Silvienne den un ocasion y Rebecca manera cu e tempo cu mi a traha ta continua, y mi sa sigur cu nan lo haci un tremendo trabao, pasobra mi ta wak e pasion y e dinamica den nan tambe, y ta algo hopi necesario pasobra e hobennan, ora cu nan ta scoge, no ta solamente nan ta scoge un estudio, nan ta scoge un pais tambe, caminda cu nan tin cu bay emigra, y e ta algo cu ta mara tambe na un inversion. Pasobra e ta un inversion di tempo, pero inversion di placa tambe ta mara ma dje.

Pues, e ta un momento masha importante pa nan y pa nan mayornan tambe, ya cu mayornan semper ta keda preocupa pa nan yiu y pa tur cos bay bon ora nan yiu ta bay afo”, Sheila Maduro a señala.

El a sigui bisa cu escogencia di estudio semper ta algo cu tin diferente opcion, pero hopi biaha no sa di nan, y ta importante berdad pa bo por haya e guia y wak kico otro opcionnan tin, pasobra apart di e trabaonan tradicional tin hopi profesionnan nobo, mirando e mundo futuro. Tambe ta bon pa e hobennan wak e otro opcionnan.

“Mi ta desea Minister hopi exito y tambe na Silvienne y Rebecca, y mi por bisa mayornan y studiantenan haci bon uso di e oportunidad di esaki, bo lo haya bon guia, no pa tur cos pasobra ora bo ta eynan bo ta experiencia, haya sa, pero miho prepara bo ta, mas resiliente bo por ta tambe, y mucho miho bo sa con pa bay on, y sigui dilanti y bira exitoso”, Sheila Maduro, director suplente di D.E.A, finalmente a bisa.