Durante aña FAVI ta haya hopi registracion di mucha cu limitacion visual

Meredith Faarup-Lacle, FAVI:

*Tanto for di WGK como di JGZ 

ORANJESTAD (AAN)-- Señora Meredith Faarup-Lacle, Ambulant Onderwijskundige Ondersteun di mucha, den servicio di Fundacion Arubano pa esnan Visualmente Incapacita (FAVI), a splica den entrevista cu Matutino DIARIO, cu enberdad den e transcurso di aña nan ta recibi registracion, tanto di WGK como di JGZ, di muchanan cu limitacion di vista, y un bez cu esaki wordo señala FAVI ta activa e muchanan aki, y duna nan e guia sea nan ta den un peuterschool, kleuter, scol basico, voortgezet (enseñanza special) of si nan ta na cas pasobra nan ta chikito ainda.

“Nos ta cuminza di biaha pasobra no ta solamente muchanan ta nace cu problema di bista of limita, pero por causa tambe cu debi na un accidente of malesa nan ta perde nan bista. Anto un bez cu docter señala esaki, nos di FAVI ta duna guia y sosten na scol, pa pa adulto, na pia di trabao of na cas, pa nan sigui cu habilidad pa por funciona independientemente”, Meredith Faarup-Lacle a relata.

El a agrega cu actualmente FAVI tin 51 mucha cual edad ta varia di baby te cu 19 aña (edad di esun di mas grandi aworaki).

E 51 muchanan ta pertenece na diferente scol: scol priva, SKOA, DPS. “Kiermen, nan ta bay scol segun nan deseo y nos di FAVO ta yega cerca di nan na scol p’asina duna e conocemento na e docentenan di scol pa sa con pa integra e mucha na scol, y FAVI ta sostene e scol cu tur e medionan auxiliar necesario, manera material, bukinan cu e mucha mester talvez den audio of cu mester ta den e sistema Braille. Esaki ta tuma lugar na FAVI, y nos ta hibe na scol, p’asina e muchanan por crece hunto cu otro muchanan cu no tin limitacion di bista”, Meredith Faarup-Lacle a señala.