Dump na Parkietenbos awo cu dos incinerator nobo

ORANJESTAD (AAN): Diahuebs mainta, Minister di Husticia y Energia mr. drs. Arthur Dowers, a asisti na un evento di "groundbreaking" na e planta di maneho di desperdicio di Serlimar na Parkietenbos.

Esaki den cuadro di e proyecto nobo di incinerator cu tin cu trece alivio specialmente pa e maneho di desperdicio medico cu no por djis bay riba e sero di desperdicio residencial/industrial cu tin na e dump, conoci como e “landfill”.

   E proyecto aki ta uno importante pa tanto e maneho di desperdicio, pero tambe pa mehora e situacion laboral pa e empleadonan.  E aparatonan aki tur ta cumpli cu standardnan Europeo.  Pa hopi tempo, e espacio den cual tabata acumula desperdicio medico, tabata casi yega e dak, cual tabata crea un situacion alarmante pa no solamente esnan trahando eyden, sino pa e area di Simeon Antonio y becindario.

Cu e instalacion di dos incinerator nobo, por reduci e cantidad di desperdicio biologico/medico di manera eficiente y sin cu esaki tin impacto grandi riba medio ambiente.