Diasabra na San Nicolas
ORANJESTAD (AAN): Ministerio di Finansa, Asunto Economico y Sector Primario, mr. Geoffrey Wever ta orguyoso pa anuncia cu Diasabra dia 29 di Augustus venidero tin un otro edicion di e San Nicolas Pop-up Market, e mercado mensual cu ta tuma luga na Plaza Lolita na San Nicolas.
E Pop-Up Market di Diasabra awor, lo bay ta di 9’or di mainta te 2’or di atardi riba Plaza Lolita na San Nicolas. E edicion aki ta conta cu hopi vendor local entusiasma. Bishitantenan di e mercado lo por encontra arte y artesania, producto local, dino jump pa e muchanan, cuminda y bebida. Lo bay tin areanan cu sombra pa e bishitantenan por sinta disfruta di e ambiente excepcional cu tin na e mercado.
"E mercado aki ta stimula economia local, ta ofrece un plataforma na empresarionan y productornan local, y ta sirbi como un paso importante pa e mercado nobo cu lo worde realisa como parti di e revitalisacion di San Nicolas. Mi ta contento pa mira cu cada edicion a crece y cu e comunidad ta yegando pariba pa sostene e vendors local," minister Wever a enfatisa.
E apoyo pa e mercado ta completamente den linea cu e Programa di Gobernacion di Gabinete AVP-Futuro, cu ta pone prioridad pa stimula e sector primario y desaroyo economico na San Nicolas.
Dufi Kock tambe: E biaha aki, e conocido autor y historiado, Dufi Kock lo tey pa brinda e ehemplarnan di su bukinan cu comunidad por cumpra. E lo tin hasta un oferta di cumpra 2 buki di e serie di historia, na un prijs atractivo di 75 Florin total. Anto Dufi lo tey pa firma e bukinan aki tambe.
Ministerio di Finansa, Asunto Economico y Sector Primario ta invita tur residente y bishitante di Aruba pa yega na e mercado Diasabra awor y contribui na e crecemento di economia local y na e fortalecimento di e comunidad di San Nicolas.
