Prome cu e tarifa nobo drenta na vigor:
ORANJESTAD (AAN) – Ainda no a drenta na vigor e tarifa nobo di transporte publico pa loke ta bus chikito, of autobus. No obstante, un biaha mas tin critica di un par di pasahero, cu tin busnan cu ta core den masha mal estado.
Kizas un florin mas no ta parce cu ta hopi placa, pero pa e trahadornan cu ta depende di transporte publico sigur cu un florin mas pa trip, ta nifica hopi pa pasobra como minimo, tin cu paga tres bus pa dia, cu ta 9 florin diariamente. Awo e lo bira 12 florin pa dia, anto saca e som pa siman y pa luna!
Tin pasahero cu ta bisa cu nan ta hustifica e aumento di tarifa pa e autobusnan bon cuida, cu tin airco, cu porta ta cera bon sin nodi keda pega, cu no tin problema pa subi y baha manera ta e caso di diferente bus cu nan stul dilanti porta ta na werki, y cu ademas e foro di e stulnan ta tur kibra, cu hasta ta daña bo paña.
Segun algun usuario, lo ta bon pa DTP haci un control riba esaki y exigi di e doñonan di bus cu no ta adecua pa core, drecha locual mester drecha, prome cu e tarifa nobo di autobus drenta na vigor.
