DTI ta constatando aumento den cantidad di afspraak compara cu 2024

Hefe di Departamento di Keur:

ORANJESTAD (AAN):   Directie Technische Inspecties (DTI) ta man yen den e dianan aki. Ta mirando cu tin un aumento den e cantidad di afspraaknan. Francis Quandt, Hefe di Departamento di Keur a duna di conoce cu tin un aumento compara cu aña pasa.

            El a indica cu esaki ta bin door di e cambio di plach'i number. DTI ta haci un suplica na comunidad pa esnan cu no tin nan auto gekeur pa pasa na DTI y haci un afspraak. Mester presenta papel di seguro valido, papel di Registratie di Departamento di Impuesto y paga 50 florin.

            Si ta un auto cu ta di huur, e rekisitonan ta keda mescos, a remarca.

            Quandt a laga sa cu DTI ainda tin dolor di cabes cu cumplimento. Tin hende cu ta traha afspraak y no ta presenta. Nan ta wordo confronta cu problema den caso cu polis para nan pasobra nan auto no ta gekeur. Si nan no ta meld cu no por acudi, nan ta perde e afspraak y e placa.

            Francis Quandt a agrega cu pa haci afspraak mester pasa personalmente na DTI cu e documentonan valido y paga di biaha.

            E persona ta haya un recibo como tambe tur indicacion pa ora di prensa cu e auto cu ta bay haci e keur.

            Loke DTI a ripara na 2024 ta cu hopi auto ta cambia nan luznan di señal pa blanco y mester ta oranje. Esey no mag. Luz blanco ta reserva pa 'reverse', a enfatisa.

            Tambe a ripara riba caminda cu tin hende ta cambia e luznan di auto pa diferente color manera biña, berde, cora y esey tampoco no mag. Mesora ora di bay DTI e autonan aki ta wordo afgekeurd.