ORANJESTAD (AAN) – Den entrevista cu DIARIO, Drs. Luenne Gomes Pieters, director di Departamento di Impuesto Aruba (DIMP), a elabora tocante e cobranza di BBO na Frontera, conoci como “Grens Belasting”.
Gomes Pieters a señala cu e ley no a pasa den Parlamento ainda, pero e ta den tapara. El a bay Raad van Advies caba, pero DIMP ta haya importante pa informa no solamente e gremionan cu a wordo invita pa DIMP sinta cu nan, na April y Mei, pero splica comunidad completo tambe, kico ta cobranza di BBO na frontera.
Director di DIMP a indica cu compara cu e sistema di Curacao y esun di Hulanda, nan conoce cu nan ta cobra omzetbelasting na frontera.
E cobranza di belasting na frontera ta ora cu ta importa un producto. Un producto cu ta wordo importa, actualmente ta carga invoerrechten y depende di e producto e ta paga accijns tambe. Si ta gasoline, cigaria, etc., ta paga accijns mas invoerrechten.
Awo ta bay bin un di tres belasting cu ta wordo cobra door di importacion di producto cu ta e BBO. E BBO su tarifa a subi for di entrante Januari di 6% pa 7%. Di con a crea e sistema aki? Gomes Pieters ta splica cu esaki ta pa crea un “level plain field” den sentido cu hopi biaha negoshinan ta wordo haci via online, tin ta cumpra hopi producto ta pone den e maleta pero no ta paga impuesto manera mester ta, pues lo bay cobra na frontera di tur hende, kiermen esnan di negoshi y tambe individual cu ta cumpra productonan online. Esaki ta proteha e mercado local, pasobra no ta haci diferencia si cumpra un tas pa scol, por ehemplo, na un negoshi of si cumpre online, pasobra den ambos caso ta paga 7% BBO.
Pues, e importado tin un “level plain field” unda e ta scoge si e ta bestel online of den e negoshi local.
Director di DIMP, seguidamente loke e negoshinan paga na frontera nan mag di trek af nan volumen di benta, di e mesun luna eynan. Kico esaki ta trece cune pa caha di gobierno? Esaki ta cu e pago ta drenta adelanta na caha di gobierno y cualkier cu bo bende bo mag di trek af loke bo a paga na frontera.
Por ehemplo si negoshi “X” a paga 100 florin na frontera di BBO anto su benta ta 300, e 100 florin cu el a paga e mag di trek af bek di su benta, anto 200 florin so e ta paga na final, ora e entrega su formulario di BBO na Belasting.
