'Driekiel' ta un otro bunita obra di arte publico pa dorna Aruba su paisahe

Minister Xiomara Maduro

ORANJESTAD (AAN): Diasabra mainta tempran e obra di arte publico 'Driekiel' di e artista Arubano Gilbert Senchi a wordo transporta y instala na e rotonde banda di Amsterdam Manor. Minister Maduro di Cultura tabata eynan pa asina yama bonbini na un otro obra di arte publico cu ta bay dorna e paisahe di Aruba. 

Un cooperacion di instancia publico y priva

Tabata aña pasa na september cu Minister Maduro a bishita sr. Senchi na su atelier na Colombia pa asina por a mira e trabounan cu tabata wordo haci pa por finalisa e obra di arte publico aki cu a confronta poco contratempo pa por a keda completa. Cu yudansa primordialmente di sector priva, y cu fondonan publico di UNOCA, ATA y TPEF e obra aki a keda finalisa y por a wordo transporta fo'i Bogota via Cartagena pa Aruba. 

Un luga cerca di su habitat

E obra di arte publico 'Driekiel' a haya un bunita luga na e rotonde banda di Amsterdam Manor, cu ta keda den cercania unda tur aña e driekielnan ta bin pone nan webonan. Por mira cu e Driekiel ta mira pa lama, mustrando nos na unda su habitat ta, y recordando nos pa proteha esaki. 

Driekel ta brinda homenahe, crea consciencia, y inspira nos

E obra di arte 'Driekiel' ta brinda homenahe na tur 'repeat visitor' di Aruba, siendo su mes e bishitante fiho na Aruba pa mas di miles di aña. Driekiel ta corda nos tambe cu Aruba ta bendiciona cu un energia masha positivo cu ta yama bonbini na bida y na abundancia cu ta atrae hende y naturalesa pa forma e circulo di bida. Driekiel ta conscientisa nos riba e fragilidad di nos naturalesa y riba e proteccion cu nos mester duna na e especie aki cu ta den extincion. Driekiel ta inspira nos, nos yiunan y Aruba su bishitantenan, pa semper cuida y keda den balansa cu nos naturalesa. 

Desvelo oficial lo wordo anuncia despues

E obra di arte 'Driekiel' ainda falta un parti pa wordo instala pa asina por wordo desvela oficialmente. Ta trata di e webonan di e driekiel cu dentro di poco tambe lo yega Aruba. Den e dianan nos dilanti lo finalisa e trabounan y lo anuncia e fecha pa e desvelo oficial di Driekiel. 

Gratitud na tur cu a yuda

Minister Maduro ta felicita y gradici sr. Gilbert Senchi y e ekipo di ARTiosa pa tuma e encargo pa crea e bunita obra di arte publico aki. E mandatario ta gradici cada persona, instancia publico y priva cu a yuda pa e obra di arte publico aki por a bira un realidad. Riba un plakaat cu lo wordo poni otro banda di caminda, lo menciona tur e nombernan di instancia y persona cu a yuda.