Rodney Solognier, presidente SPA:
- Ta hopi material tin di wordo cambia
- Sindicato ta spera cu pa 2025 lo por mehora
ORANJESTAD (AAN) E presidente di Sindicato di Polis (SPA) Rodney Solognier, a comenta den entrevista cu DIARIO cu e drechamento di Scol di Polis ta un reto ainda, tin hopi cos mester wordo cambia, pero t’e momentonan aki, nada a wordo haci.
SPA a trece e situacion aki algun bez caba na e Minister su orea, pero ainda nada a tuma lugar. Solognier ta spera si, cu pronto esaki por haya solucion. “Mi tin entendi cu e ta riba pipeline, pero e fecha ainda mi no por duna, pasobra mi no ta wak progreso tampoco”, Solognier a remarca.
Solognier a subraya cu drecha scol di polis ta hopi importante, pasobra tin basta aspirante nobo ta drentando scol di polis, sin conta e cursonan cu ta wordo duna apart di e klasnan na polisnan nobo.
Drechamento di scol di polis en parti ta responsabilidad di e leiding di KPA, pero e ta riba scochi di gobierno pasobra e minister tin cu zorg pa e edificionan ta den bon condicion, y mantene e presupuesto pa e wordo ehecuta pa wordo drecha.
Solognier a agrega cu hopi a wordo priminti, pero den e parti di opleiding e no ta mira claridad ainda. “Nos ta pushando poco, poco, sperando cu e aña cu ta bin, mirando cu ya aña ta cabando, nos no por spera mucho mas pa e aña aki, pero sperando cu pa cuminzamento di aña si, esey por bira un realidad.
Responsabilidad direct di e sindicato esaki no ta, pero unda cu SPA por yuda pusha e proceso e ta hasi su esfuerzo pa pushe mas. Asina Rodney Solognier, Presidente di SPA a indica.
