Segun Conseho Social Economico:
ORANJESTAD (AAN): Conseho Social Economico (SER) di Curaçao ta haci un yamada fuerte pa intensifica e cooperacion entre paisnan di habla Hulandes den Caribe pa asina ey, den consulta cu otro, enfrenta retonan social y economico comun.
E yamada aki ta bini despues di un tayer di dos dia, organisa pa Organisacion Internacional di Trabao (ILO), cu a tuma luga 11 y 12 di October ultimo na Hotel Torarica, Paramaribo, Surinam.
E evento aki a pone enfoke riba e situacion di Sürnam, y a trece hunto representantenan di gobierno, di sector empresarial y di organisacionnan di trahadonan Surinameño pa fortifica e futuro di dialogo social bipartite y tripartite na e pais Suramericano.
Durante e tayer, dos tema importante a ser ampliamente discuti, cu ta formalisacion di e sector informal y un transicion husto pa un economia sostenibel.
Segun un experto cu a asisti, "Formalisacion di e sector informal ta esencial pa garantisa proteccion social y pa mehora oportunidadnan di trabao."
E tayer tambe a destaca varios obstaculo cu ta stroba eficacia di dialogo social na Surinam. Un di e desafionan mas grandi ta falta di confianza mutuo entre e interlocutornan social—gobierno, empleadonan y trahadonan. Varios participante a enfatisa cu "sin confianza y respet, cualke dialogo ta destina na fracasa,"
Gobierno y sector priva di Surinam a asisti na e tayer. Representantenan di Ministerio di Trabao, Empleo y Asuntonan Hubenil y tambe grupo di empresarionan, manera Vereniging Surinaams Bedrijfsleven (VSB) y e Asociacion di Fabricantenan di Sürnam (ASFA), hunto cu e sindicatonan Central di Organisacion di Funcionarionan Publico (CLO) y e Federacion di Organisacionnan Profesional di Sürnam (SBOF), tabata presente.
Na fin di e tayer, e participantenan a enfatisa riba e necesidad agudo di trainingnan specialmente dirigi riba (r)establece confianza y maneho di conflicto, y tambe a haci un yamada pa yega na un structura di dialogo mas centraliza.
E fragmentacion actual di organisacionnan ta pone cu decisionnan ta tarda mas y e coordinacion ta deficiente. Un structura mas centralisa lo acelera e proceso di toma di decision y tambe lo yuda fortifica cooperacion entre e interlocutornan social y haci uzo mas eficiente di recursonan tecnico y financiero, cu lo permiti cu e dialogo social tripartite ta mas efectivo.
SER di Curaçao, cu riba nivel tecnico tambe tabata presente na e tayer, a comparti su experiencia, enfocando riba e necesidad y valor agrega di tin un sosten tecnico y administrativo fuerte, cu ta permiti un preparacion adecua di e dialogo social pa asina interlocutornan social por hiba e dialogo di un forma efectivo y eficiente.
“Intensifica e cooperacion existente entre Aruba, Curaçao, Sint Maarten, Surinam y tambe e islanan BES, y comparti cu mas frecuencia bon practicanan, lo yuda nos soluciona retonan comun den reforma di nos mercadonan laboral y den combati desigualdadnan social mas efectivamente,” segun e conclusion di SER.
