ORANJESTAD (AAN) – Dr. Jayburtt Dijkhoff, director di Fundacion SIKI, a yama un conferencia di prensa,
conhuntamente cu Sindicato TOPA, den cual a duna di conoce cu dia 3 di September e ta bay lanza un curso titula: “Con pa goberna un pais”.
Dijkhoff a menciona cu esaki ta e prome curso completamente independiente, no partidista, basa riba ciencia, kico ta un sistema politico, democratico, y pa e Estado di Derecho cu nos tin aki na Aruba.
“E ta algo cu Fundacion SIKI kier lanza, pa cambia e panorama di Aruba, mirando cu nos ta yegando na un panorama hopi critico, pa e situacion di nos pais.
“Pa motibo di esaki mi kier anuncia cu nos mester di e sosten for di pueblo; nos a invita varios organizacion importante den nos pais, cu ta sostene democracia, di un forma of otro, y nos tin e gran placer awe, di presenta cu Sindicato TOPA cu a sostene e curso aki, pa sostene e desaroyo di democracia berdadero na nos pais. Nos ta hopi contento, y nos ta bay formaliza esaki”, Dr. Jayburtt Dijkhoff a duna di conoce.
Den e siguiente edicion lo bin cu informacion mas amplio tocante locual Jayburtt Dijkhoff a trece dilanti.
