Minister Gerlien Croes:
ORANJESTAD (AAN)-- Minister Gerlien Croes, den entrevista cu DIARIO, a bisa cu den e presupuesto aworaki, por mira cu a inverti hopi den locual ta e capacidad cu mester tin den Gobierno pa por sigui move.
Como ehemplo, el a comenta cu ora el a yega den Gobernacion, den e Departamento MDC (Centro Multi Disciplinario) tabata falta psicologo, logopedista, “opvoedondersteuning”, y un lista di hende. “Mi ta scucha opositornan comenta cu ‘goederen en diensten’ a subi, pero si mi tin cu ekipa mi departamentonan, claro cu e ‘goederen en diensten tin cu subi.
Pero si mi no ta ekipa nan, e lista di muchanan cu no ta na scol ta bay sigui crece pasobra mi a bin hay’e na casi dos mil, pero esey nan no ta bisa acerca. Mi ta haya lastima cu e politica aki ta wordo hunga pasobra e realidad ta cu nos a bin haya hopi cos no regla. Randvoorwaaden den gobierno, hopi lugar a keda pendiente, bashi, medionan cu no a wordo destina pa awo por tin un aparato gubernamental cu por funciona tambe, y nos no ta cla ainda”, e dignatario a señala.
Pa bay na e pregunta principal cu ta inversion, e dignatario a indica: “Ora mi ta wak e capacidad di un departamento manera Obranan Publico (DOW), e tekort (deficit) ta mesun grandi ainda, of kizas un tiki menos, pero e realidad ta cu eynan por wak kico ta costa bo, ora cu na termino largo bo no ta inverti den bo propio departamentonan tambe”, Minister Gerlien Croes a señala.
E mandatario a bisa cu, tocante loke ta inversion, e ta di acuerdo enberdad, cu e trabaonan di inversion, infrastructuralmente, tin un retraso.
“Y e tin di haber, principalmente aworaki, cu e proceso, entre otro, di ‘Algemeen Investeringsfond’. Aruba, pa añanan, no tabata tin un ‘Algemeen Investeringsfond di e forma aki”, e dignatario a expresa.
