DOW a tuma iniciativa pa embeyecimento di rotonde Plaza di Cultura

Rotonde ta bay haya un cara nobo:

ORANJESTAD (AAN):   Antes e tabata conoci como Rotonde Las Americas. Sinembargo su nomber ta Rotonde Plaza di Cultura. E rotonde aki for di un tempo caba a drenta den un fase di cambio. Riba esaki, Daryl Lue di Departamento di Obranan Publico (DOW) a duna di conoce cu actualmente nan ta bezig cu ne y a cuminsa cu e proyecto na 2024, den cual DOW mes a ehecuta e proyecto loke no ta algo comun.

            Lue a splica cu DOW nunca ta haci un proyecto riba su mes. Semper ta pa medio di destahonan publico. Den e caso aki a tuma e reto pa hacie riba nan mes.

            El a laga sa cu a surgi un tiki tardansa y mester a wak con pa mitiga esaki. DOW su rol ta pa haci mantencion, pero nan ta trahando pa haci un instalacion grandi riba e plaza y e ta tumando su tempo pa keda cla cu ne.

            Daryl Lue a sigui bisa cu algun trabao a wordo haci caba. Klinker a wordo poni, e basha e banchi, a haci parti di e infrastructura, a instala cashi pa e meter nobo, a traha riba e parti di irigacion, entre otro. E siman aki a basha e fundeshi pa e esculturanan cu ta bay bin eynan y pa e mast di bandera.

            Pa loke ta locual ta bin pa decora e rotonde, Lue a indica cu a acerca Cas di Cultura pa den futuro artistanan local por crea arkitectura of algun escultura. Tambe ta bay tin luznan cu ta bay cambia di color segun tema y e ta bay demostra e cultura di Aruba ariba e rotonde

            Ta proyecta pa e rotonde keda cla den e di tres kwartaal di e aña aki. Loke falta aworaki ta pone mata y luznan.

            E mantencion lo ta na encargo di DOW. Esaki ta un proyecto piloto cu DOW a cuminsa cu ne 'from scratch' y aworaki pa mantene completamente, el a agrega.

            Despues di esaki DOW lo sigui wak cual ta e otro rotondenan cu nan ta bay embeyece.