DOW a sorprende tur hende bisando cu lo bay traha verkeersplateau riba un highway

ORANJESTAD (AAN): Riba Diabierna, DOW a haci un anuncio cu a laga hopi observador keda babuca! 

Pa prome biaha den historia, nan lo bay construi un verkeersplateau riba un caminda cu ta worde considera ‘highway’ na Aruba.

   Semper tabata traha verkeersplateau riba caminda ‘secundario’ of cayanan den ciudad.  Pesey ta cu gran atencion a tuma nota cu awor ta bay traha uno riba Avenida Nelson Oduber, na altura di e cruzada cu Palm Beach.

    Departamento di Obra Publico ta desea di informa comunidad di Aruba y specialmente automobilistanan cu ta haci uzo di Avenida Nelson Oduber (ex-Sasakiweg) y Palm Beach area, cu otro siman dialuna dia 11 di October 2021 y diamars 12 di October 2021, lo bay construi verkeersplateaunan na e crusada di Palm Beach pa asina evita accidentenan tuma lugar.
   Dialuna lo cera for di rotonde di Superfood direccion Avenida Nelson Oduber (nort) pa asina constui 2 verkeersplateau y diamars lo construi e otro direccion Palm Beach.
   Horario di e ceramento lo ta for di 7’or di anochi te cu 6’or di mainta.

   Ruta di desviacion lo keda indica cu borchi y baricadanan di aviso.
   Alavez DOW a anuncia atrobe cu e verkeersplateaunan akinan ta temporal ya cu otro aña nos lo construi e rotonde mes.

   Nan no a splica pakico no a probecha di October Vakantie pa a haci e trabao aki, y a bay pa ehecuta e trabao net e prome siman DESPUES di vakantie.