DOW a haci un 'testing' di 'micro pavement' na rotonde di Weg Fontein  

Awe lo sigui cu e test na Yaraweg

ORANJESTAD (AAN):   Departamento di Obranan Publico (DOW) a informa cu diaranson mainta na rotonde di Weg Fontein a tuma lugar un 'testing' di loke ta 'micro pavement'.

            Manera a menciona anteriormente, e saco blanconan cu tin staciona cerca di e brug di Green Corridor ta material di 'micro pavement'.

            'Micro Pavement' ta un mescla di polymer modifica, cu ta wordo aplica frieu uzando ekiponan specialisa riba e caminda di asfalt pa alarga e bida di e capa di asfalt. E ta un sistema mundialmente conoci cu lo bay wordo aplica riba e camindanan cu ta cay bou di e proyecto di Green Corridor.

            Micro pavement lo bay wordo uza unda e caminda a cuminsa perde grip of tin scheurnan fini. Green Corridor ta bay implementa e sistema aki como prevencion pa asina percura pa e camindanan di Green Corridor keda cu e grip necesario y cera e scheurnan fini cu ta normal despues cu e caminda tin algun aña caba.

            Na ora di aplica esaki e tin un color bruin y despues di un par di ora cu esaki seca e ta bira preto.

            Diaranson a tuma lugar e prome “testing” na Weg Fontein. E test di micro pavement di lo sigui awe diahuebs 20 di maart 2025,  cu e fase 1 di Yaraweg.

            E duracion lo ta desde awe 20 di maart 2025 te dia 18 di April 2025. Orario di trabou lo ta di 9'or di mainta te 4'or di atardi.

            Ruta di desviacion lo keda indica cu borchi y baricada di aviso.