DOW a cuminsa cu un proyecto di “Re-embeyecimento rotonde Plaza di Cultura”

Ta proyecta pa caba meymey di December 2022 cu fase 1

ORANJESTAD (AAN): Departamento di Obranan Publico (DOW) a cuminsa cu un proyecto di “Re-embeyecemento rotonde Plaza di Cultura”. E proyecto lo bay wordo haci den fase.

• E prome fase ta encera gran parti di e preparacion di suelo “grondwerk”, esey kiermen kita tur e yerbe bieuw/existente, hisa e muraya existente di e fontein cu dos careda di bloki y yena e tereno cu santo y gordura. Matanan existente di Watapana, Guyaba y Fofoti Haag lo keda manteni, y otro matanan lo wordo kita, transporta y re-planta den e seccion berde di e parkeerplaats di DOW. Tambe lo haci otro trabownan di mantencion na e banchinan y lo realoca e watermeter kast. Un fundeshi pa un palo di bandera (vlaggenmast) tambe lo wordo construi. Trabaonan di e prome fase lo wordo haci den periodo di Augustus pa December 2022.
• E Segundo fase ta encera pone tuberia di irigacion y su systema di pomp, instalacion di coriente y ponemento di klinkers. E segundo fase lo continua den 2023.
• E di tres fase ta encera planta algun matanan local y algun matanan hopi gusta y hopi uza den nos hofinan. Tambe lo instala luznan decorativo permanente, caba di instala e sistema di irigacion, instala e palo di bandera y lo baha e haltura di fofoti pa tin un mihor bista riba e embeyecimento. Fase 3 ta proyecta pa 2023/2024. E escogencia pa vegetacion ta pa planta mata nan local di color parti pafor di e ex-fontein y den e ex-fontein lo focus riba mata nan protehi di Aruba. Pa escogencia di mata nan protehi a consulta cu stichting ‘Ban Lanta y Planta’.
• E di cuatro fase ta encera pone obranan di arte riba e rotonde. Fase 4 ta proyecta pa 2024 en adelante. E obra nan di arte proyecta lo mester refleha elementonan di nos cultura (p.e. idioma, musica, custumber/tradicion, historia, etc)

            E prome y segundo fase di e trabou ta encera mas e parti di preparacion di e rotonde pa pone un embeyecimento y no lo weita e bunitesa ainda. 

            Den fase tres y cuatro si ta bay weita e embeyecimento.

            Manera a menciona cu e proyecto a start 17 di Augustus 2022 y ta proyecta pa caba meymey di December 2022 cu fase 1.