Ta mira cu e siman aki si e lo finalisa
*Contratista a confronta cu scarcedad di klinkers
ORANJESTAD (AAN): E fecha di 10 di November 2023 a yega te pasa. Nada a socede!
Ta conoci, cu e fecha ey di Diabierna cu a pasa, tabata e deadline pa e Contratista entrega DOW bek e proyecto di remodelacion, y habri e caminda den Wilhelminastraat for di El Gaucho Restaurant bay pabao.
DOW a confirma cu e Contratisa a informa nan, cu e compania cu mester a entrega nan klinkers, no a haci esey na tempo como cu no tabatin mas disponible na e momento ey, pues nan no por a caba cu e trabao.
Pero e compania a laga sa, cu Diabierna mes nan lo sa di entrega e resto di klinker. Pero ya ta laat pa e Contratista, como cu no por pone nan bek den 1 dia.
Contratista a informa DOW cu nan lo bay tin mester di 5 dia di trabao mas, pa asina keda cla poniendo tur klinker, y asina habri e caminda.
E speransa tey cu e Contratista lo haci un trabao rapido y bon, y cu ohala ningun awacero pisa no bay stroba e trabao. Pasobra temporada di fin di aña ta yegando, y e comerciantenan eybanda y comunidad ya no por sigui sufri mas di e situacion aki.
Mientras tanto e pida den Columbusstraat mes a keda cla, y awor hasta Gobierno ta solicitando idea di comunidad pa duna e Plaza aki un nomber.
