DOW a cambia e fecha di 'switch'  di caminda pa dialuna 4 di Juli na rotonde di Palm Beach  

En conexion cu situacion di mal tempo:

ORANJESTAD (AAN) – Director di Departamento di Obranan Publico (DOW), Ing. Marlon Croes, a yama un conferencia di prensa pa informa pueblo, tocante e desaroyo di e rotonde cu ta wordo construi aworaki, na e ex-cruzada di Palm Beach.

            Manera ta conoci algun luna atras cu fase uno, cu tabata e prome mitad parti pabao, pero despues di a haya algun reto a haci e trabao di esaki, conhuntamente cu e contratista y e compania di utilidad. E trabao a avanza hopi lihe y den e conferencia di prensa aki a anuncia cu nan ta bay drenta den e fase 2 di e ehecucion di e proyecto aki. Esaki ta e parti banda pariba cu lo wordo construi.

            Sinembargo, a informa diamars cu a tuma e decision hunto cu Cuerpo Policial cu e dia cu nan lo haci cambio ta  dialuna 4 di Juli proximo, y no awe diaranson, pa motibo di e situacion di mal tempo.          Dialuna lo habri e parti di e rotonde banda pabao, pa e trafico di Noord for di Malmok, direccion di Playa por flow, haci uso di un lijn so cu lo pone disponible na e rotonde, pa e trafico por bay direccion di Oranjestad, sin problema.

            Ora ta sali di area di hotel, di south beach bin ariba, ta subi e rotonde y bay zuid si kier bay Playa, y si kier bay noord, Misa di Noord, lo habri un pasada na haltura di Keito. E ta wordo indica cu baricadanan cu borchi, pa por guia e trafico pa lora man robes drenta Keito y tuma e caminda di Palm Beach noord.
DURACION:

            E duracion di e trabao aki di fase dos, lo ta ocho siman largo, si no surgi reto. E meta ta pa finaliza e rotonde aki pa final di Augustus, unda cu lo mester cera e rotonde por completo. Croes a indica cu riba esaki, na su debido tempo lo bin cu e cambio di rutanan pa informa comunidad di Aruba, vooral esnan cu ta trafica den e area di Palm Beach, con esaki lo tuma lugar.

            Marlon Croes a señala cu e trafico cu lo bay haya un cambio basta drastico, compara cu fase uno, ta esun cu ta bin di Oranjestad y cu ta bay direccion di Malmok. Esaki tin cu drenta na Keito, sigui e borchinan, sali di e caminda di Palm Beach noord, y eynan ta bira na man robes y drenta pariba di Gran Victoria, y eynan ta sigui e borchi cu ta sali bek na Avenida Nelson Oduber. 

            Director di DOW a menciona cu e meta ta pa habri e rotonde aki, por completo, den e prome siman di September proximo.