Parlamentario Carlos Bermudez:
ORANJESTAD (AAN): Dialuna merdia e parlamentario a mira cu gran satisfaccion con e trabou di reparacion di caminda a tuma luga di manera rapido dialuna, despues di un fin di siman di hopi awa. Bermudez a expresa su elogio na empleadonan\contratistanan di Departamento di Obranan Publico (DOW) pa nan dedicacion na yuda pone caminda den un estado mas safe pa e automobilistanan.
Sinembargo, como representante di e pueblo, Bermudez ta enfatisa cu nos mester bay mas leu cu solamente yena krater cada biaha cu awa ta yobe. "Nos a aproba un presupuesto di 5 miyon florin pa asfaltamento di nos camindanan den 2025. E presupuesto aki ta ratifica pa e constelacion nobo di Parlamento, pero nos a yega mita di aña y ainda no ta mira implementacion di e fondo aki," Bermudez a bisa.
Segun e parlamentario, ta mucho mas eficiente pa uza e fondo disponibel pa reconstrui y asfalta caminda na un manera duradero, en bes di manda ekiponan pa yena krater cu lo bolbe sali ora awa bolbe cay. “Nos ta gasta mas ora nos ta yena e mesun buraco un biaha tra’i otro. Un plan di mantenemento integral lo por reduci gasto y frustracion di nos automobilistanan,” Bermudez a agrega.
Banda cu DOW tin un lista di camindanan plania pa 2025, parlamentario Bermudez ta di opinion cu hopi caminda di santo no ta haya nan debido atencion. Ciudadanonan ta pasa cas pa cas busca firma, manda carta pa minister cu copia pa DOW, pero DOW no ta contesta e cartanan y tampoco ta hinca e camindanan den nan plan.
Mientrastanto, e parlamentario ta satisfecho cu e velocidad cu cual DOW a saca unidadnan dialuna mainta. “Compara cu e periodo anterior, caminda e tipo di reparacion simpel tabata tuma siman, awor nos ta mira reaccion mas rapido di DOW, y esey ta un paso positivo,” el a indica.
Bermudez ta haci un yamada na Gabinete AVP-FUTURO pa hunto cu DOW sali cu un plan structural pa renoba e red vial nacional, hopi caminda ta den mal estado. “Nos pueblo merece caminda safe, duradero y cu ta digno di un pais cu ta colecta miyones na motorrijtuigbelasting y ta inverti den tur aspecto di producto Aruba, cu ta conta pa local y bishitante. E ora ta awor pa move for di reparacion temporario pa renobacion sostenibel,” Bermudez a conclui.
