E wiel no a wordo bon inventa e biaha aki
ORANJESTAD (AAN): Diahuebs mainta, dado momento e buchi di Douaneronan a yena y nan a dicidi na walkout na sector di Aeropuerto, y esaki cu apoyo di nan Sindicato.
Na opinion di Douaneronan, nan ta convenci cu e sistema di BBO na Frontera introduci na Aruba na comienzo di Augustus ta uno masha deficiente mes ora di haci control, y e protocolnan envolvi riba e reglanan nobo ta basta vago ainda.
Esaki ta conta pa tanto e control di pasaheronan cu ta yega Aruba cu producto den maleta, y tambe carganan cu ta wordo baha via Air Cargo na Aeropuerto. E forma di control ta birando un dolor di cabes y e wiel cu Gobierno a purba inventa cu e asina yama ‘rij cora’ y ‘rij berde’ no ta funciona adecuadamente, y esaki ta pone cu Gobierno ta kedando sin haya kizas miyones di Florin den e control aki.
Loke ta empeora full e sistema ta cu Aduana di Aruba no tin suficiente funcionario tampoco pa yuda cu e control den e sistema nobo di BBO na Frontera. Incluyendo e hecho cu e tax-code di Aruba a cambia, y e.o. impuestonan di importacion a conoce cambio unda cierto producto tambe a baha, y cambio riba e sistema cu no ta djis cobra awor riba accijns basa riba contenido di boternan di licor, sino tambe e balor di cada boter.
No mester tuma e Douaneronan na malo. Nan kier haci e trabao bon, pero e sistema introduci na Aruba ta pone cu Gobeirno ta bay perde mas placa. Y pa tal motibo nan ta halando atencion di Gobierno pa tene cuenta cu no ta djis un bottleneck so a forma awor cu e BBO na Frontera, sino ta monton di obstaculo a aparece.
