DIA DI PRENSA 2023
ORANJESTAD (AAN): Awe cu ta 1 di September 2023, riba e dia tan importante cu ta dia di prensa, DIARIO kier a desea tur esnan laborando den e mundo aki un feliz dia. No tin cu lubida e importancia di un periodista pasobra, mas sabi e ta, mihor nos sociedad lo ta. Pasobra danki na e trabao, pueblo ta lesa of scucha loke ta pasando den sociedad, y asina nan ta mihor informando nan. Claro, cu mihor e docente ta... mihor e studiante ta tambe.
No lubida cu prensa tey pa informa riba un forma intergro, honesto y capaz. Awor cu tin monton di fake-news ta plama tur dia rond riba social media, prensa confiable tin di keda informa digno pueblo necesariamente y no laga teorianan di conspiracion, y medianan riba social media cu tey djis pa crea noticia falso, no influencia e poder di prensa.
Ban keda riba e nivel cu Aruba a custumbra di ta y cambia esaki solamente ora cu e ta pa mehora. Feliz dia di prensa, merecidamente DIARIO y demas prensa por celebra esaki cu orguyo. Ta nos tur por haci e diferencia y ta obliga pa haci’e, esey si ta eherce loke bo ta haci cu amor y dedicacion.
No lubida tur e veteranonan den prensa cu awor ta disfrutando di pensioen y cu no ta activo mas, of esnan cu a bay laga nos. Incluyendo nos fundador Jossy M. Mansur, kende a percura pa Aruba a haya su propio corant na Papiamento cu su mesun imprenta, y a defende e isla semper pa cu su lucha sagrado di haya libertad. E trabao cu Jossy a haci ta algo cu ainda tin hopi admiracion pe, hasta awor cu e ta descansando na paz.
Tambe DIARIO ta corda riba grandinan manera Carlos Kelkboom, Janchi Tromp, Ramiro Tromp, y mas. Nos mesun Juby Naar y Django Simoons cu awor ta disfrutando di nan pensioen na cas.
Corda con nan tabata siña no djis saca potret riba caya, pero nan por a traha den camber scur (donkere kamer) y actua semper na un manera adecua y responsabel, y tabatin respet di comunidad y di instancianna oficial. Claro, no ta facil pero no imposibel.
Na tur empleado di DIARIO, ex-empleadonan, y demas periodistanan na Aruba. Danki pa boso sosten na nos tur aki na Aruba y sigui cu e bon trabao.