Roderick Croes, director:
ORANJESTAD (AAN): Roderick Croes, Director di Departamento di Douane a duna di conoce cu den cuadro di comunica miho cu clientenan di Douane a dicidi di sinta hunto bek. Aworaki a sinta cu Aruba Trade and Industry Association (ATIA), Comerciantenan Uni Aruba (CUA) y cada un a bay cu nan miembronan.
Ta purba di tene un sesion tur luna p'aworaki y ta purba sinta cu mas cliente posibel, a indica. Banda di esaki tin tur e brokernan cu ta traha cu Douane y pa medio di email por acerca nan. Douane ta habri pa tur. No solamente comerciante, broker y tur hende cu lo kier haya sa algo di Douane lo por acudi y haci pregunta, Croes a indica.
El a sigui bisa cu tur cu ta importa/exporta producto of cu ta laga productonan pasa di transito nan tin di haber cu Douane.
Roderick Croes a enfatisa cu e personanan cu por ehempel, ta trece Aruba paña den maleta pa bende despues sea riba facebook of otro manera, nan tambe mester declara na Douane. No ta husto pa esnan cu ta bin cu container y cu tin cu paga invoerrechten cu e personanan aki ta gewoon drenta sin declara nan mercancia. Asina Douane ta purba di mitiga e situacion.
E hendenan aki tin cu presenta tambe nan KvK nummer of nan belasting nummer. Tur esey Douane ta pidi pa asina por sigura cu nan tin un negoshi legitimo. Naturalmente nan ta purba di pasa, pero Douane ta purba di mitiga tur eseynan, a bisa.
