Douane a pone obstaculo ridiculo pa deportistanan yegando pa Aruba Hi-Winds

Kico ta pasando cu Ministerio di Xiomara Maduro

• Varios Windsurfer a wordo obliga pa paga dineral na Douane
• Esaki ta un berguensa total pa Turismo di Aruba 

ORANJESTAD (AAN): Mientras cu Gobierno, Aruba Tourism Authority, AHATA, y tur instancia ta haci nan best pa sigui atrae turista, y tambe deportistanan bin Aruba pa asina competi den eventonan internacional di clase mundial... ata diripiente ta haya algun Douanero na Aeropuerto ta dal Aruba un bofta den wowo, door di lanta obstaculo ridiculo y hasta exigi pago pa por sali cu nan planki y bela di windsurf.  Nan ta participando den Aruba Hi-Winds cu ta e fin di siman aki.

   Aruba Hi-Winds ta un evento cu a start desde decada di 1980 caba na Aruba.  E ta atrae decenas di top windsurfer for di rond mundo.  Nan ta bin cu nan mesun ekipo di surf pa participa den dje, cu pa hopi aña caba ta asina.  Na final nan ta bay bek cu e ekiponan aki, como cu nan tin mester di dje pa competi den siguiente careda.

   Aparentemente tin un of mas Douanero na Aeropuerto, cu ta kere den “teoria di conspiracion”, y a cuminsa pensa cu e Windsurfernan aki ta bin pa bende nan planki y bela na Aruba.  Y a cuminsa exigi pa nan paga pa ‘Invoerrechten’.  Siendo cu e plankinan aki tur ta gasta, bieu, y ta nada nobo.

   E website di Aruba.nu a publica Diabierna pa henter Reino Hulandes lesa, con Douane di Aruba a trata varios windsurfer cu a yega pa competi den Aruba Hi-Winds.  Nan a relata e storia di windsurfernan cu a caba di yega Diamars 7 di Mei for di Bonaire pa participa, y a topa cu obstaculo ora cu nan kier a busca nan ekipahe.  Nan a topa cu e sorpresa cu nan ekipo no tey.  Douaneronan a splica nan mester ‘inklaar’ y declara impuesto di importacion na Customs Aruba.

   E deportistanan di Bonaire a splica e oficial di Douane, cu nan ta participa 30 aña caba cu Aruba Hi-Winds y esaki ta prome biaha den nan bida cu nan a wordo obstaculisa y wordo exigi pa bay paga Invoerrechten.

   “Kizas boso lo por bende e ekiponan aki,” tabata e contesta cu Douane a duna Pieter Zweers pa asina hustifica pakico nan ta paga impuesto di importacion.  Mas windsurfer di Bonaire cu a yega mesun 7 di Mei, a haya nan confronta cu mesun problema cu Douane na Aeropuerto.

   “Tin ya mas di 30 aña cu mi ta bin competi den Aruba Hi-Winds.  Semper mi ta bin cu mi mesun ekipo.  Nan ta poni den un tas grandi rondo.  Esaki ta prome biaha cu nan ta bin confrontami cu e regla aki,” segun e windsurfer Zweers a declara na e portal di noticia.

   Pa toch participa den e competencia di Aruba Hi-Winds cu ta di 8 di Mei te cu 13 di Mei, nan a exigi pa e paga 786,95 Florin (esta 437 Dollar) pa e tres windsurfernan.  “Esaki ta special.  Pasobra mi cosnan no ta nobo.  Esaki bo por mire claramente.  Sinembargo, mi no a logra convence e Douanero di esey.  El a keda insisti demasiado,” segun Zweers a indica.

   Su ekipo no tey pa colmo: Ora cu windsurfer Zweers a paga e 768 Florin, e por a cana bay na e loods unda su cosnan lo tey.  Pero ora cu el a yega na e loods di Douane, su ekipo di windsurf no tey.  A resulta cu su ekipo accidentalmente no a wordo baha di e avion di EZ Air, y a sigui bula rumbo pa Curaçao.

   Zweers ta pensa, cu si e no a paga, kizas riba Diaranson e lo por a djis bay Aeropuerto y busca su ekiponan.  Pasobra esaki a pasa cu un otro Windsurfer.  E no a paga invoerrechten, y e siguiente dia por a djis bay busca su ekiponan.  Pues otro Douaneronan cu tabatin otro dia NAN SI STIMA Aruba y sa di e importancia di evento internacional di Aruba Hi-Winds.

   E potretnan aki ta pa cortesia di aruba.nu

   A compronde cu e organizadornan di Aruba Hi-Winds ta bay drenta den contacto cu Douane sperando di por regla algo pa e windsurfernan aki cu a keda perhudica.  Nan ta spera di por haya contesta di e Hefe.  Ohala hasta Ministro Xiomara Maduro por cay den e asunto aki.

   Pasobra si esaki sigui socede na Aruba, kizas ya pa 2025 lo bo no haya ningun windsurfer ta bin Aruba mas pa Aruba Hi-Winds.