Tyson Lopez, CEO di ACF a duna di conoce:
*Pa 2050 Aruba mester ta mas inclusivo den naturaleza
ORANJESTAD (AAN) — Aruba Conservation Foundation (ACF) a ricibi bishita di dos profesor di Wageningen University & Research, y den entrevista cu DIARIO, señor Tyson Lopez, CEO di ACF, a duna di conoce cu nan a bin pa presenta y lanza un proyecto cu, eigenlijk, nan a cuminza dos aña pasa.
“E ta un proyecto cu nan ta haciendo riba nan mes, pa sostene na Aruba y den nos caso, nos tambe, pa crea un vision mas inclusivo den e naturaliza di Aruba completo. Dus, den nos industria di turismo, agricultura, energia, y con eigenlijk den futuro pa 2050, nos mester ta mas inclusivo den naturaleza”, Lopez a reitera.
Wageningen, den e caso aki ta e partner cientifico, cu ACF ta trahando cu ne e ultimo dos añanan, na un manera hopi intenso y nan a yuda cu diferente proyecto caba. “Ora cu nos a wak cu nan a haci e proyecto aki na 2019 na Bonaire, nos a acerca nan y bisa nan cu nos tambe kier algo asina, pasobra pa nos ta importante, como organizacion di conservacion di naturaleza, pa tin un bista mas extenso di unda nos kier bay cu naturaleza y con nos kier asegura esey.
“Nos ta traha dia pa dia pagando candela, core tras di hende, pero ta importante pa nos tin un vision na termino largo, p’asina tin un miho futuro tambe, traha mas strategicamente, unda nos kier bay. Y den e caso aki e approach cu nan ta uza ta uno hopi bunita y importante unda cu nos a invita diferente stakeholder, diferente organizacion, pa participa den esaki”, señor Lopez a menciona.
E dos profesor lo ta e siman aki na Aruba, pa introduci of lanza e proyecto, y lo tin un presentacion na Fort Zoutman. Comunidad di Aruba por wak e investigacion, e vision y e documento riba ACF su website: acf.aw. Eynan por click habri y lesa e documento.
“Mi a bira hopi contento cu nos a yega na e punto aki y e ora ey ta keda na nos como comunidad di Aruba, pa pasa door di esaki, pick’e up y traha hunto riba cosnan cu nos ta kere te importante pa tur hende”, Lopez a remarca.
