Dos muher Colombiano a purba viaha pa Spaña cu cocaina bon scondi den hair extensions

CALI: E cabey cu aparentemente tabata natural, tabatin scondi na su raiz como 900 gram di cocaina.

  E muher tabatin meta di subi avion rumbo pa Madrid (Spaña) pa haci entrega di e cargamento.  Pero ora cu el a yega na Aeropuerto Internacional Alfonso Bonilla Aragón na Cali, el a bira hopi nervioso mes.

   Autoridadnan cu tabata vigila e pasaheronan, a cuminza sigui’e di cerca, y na final nan a dicidi na cuminza papia cu e muher aki di 30 aña di edad.  E muher tabata cana cu su paspoort den man, ta buscando su Gate pa aborda su vuelo, y su actitud tabata hopi notable mes.  Autoridadnan a papia cune na forma calmo, y a pidi’e pa mira su ticket y cu nan kier revisa su maletin.

   Pero ora cu Autoridad a cuminza haci’e algun pregunta, e muher a bira mas nervioso cu nunca.  E ora nan a dicidi na hibe na Sala di Body-Scan, y aki den su cabey di extension, a bin mira obhetonan iregular den forma di tubo of paki largo fini.  E ora na forma voluntario e pasahero a dicidi na kita e “peluca” di hair-extensions, y asina a bin haya 900 gram di cocaina.

   Ora cu el a sinti cu ya nan a descubri’e, e muher a basha abao y admiti cu den su partinan intimo e tin mas droga scondi.  Aki ta unda cu autoridadnan a lage bay sake afo, y el a saca un condom cu ta yena cu 200 gram di cocaina.

   Otro caso na Medellin: E modus operandi di hiba cocaina den pakinan chikito scondi den peluca, a socede tambe na departamento di Antioquia.  Na Aeropuerto José María Córdova na Rionegro, un otro muher a trata di subi avion cu 650 gram di cocaina den bolitanan chikito di plastico cu ta parce hair-curlers pa cabey, y den su parti intimo tabatin 200 gram den un condom.  Esaki tambe tabata viahando rumbo pa Madrid, Spaña.

   E forma nobo di hiba droga a alerta autoridadnan Colombiano mesora, pa e forma novedoso.  Cada biaha narcotraficantenan ta inventa forma nobo pa purba burla Polis y Aduana.  A yega di haya cocaina scondi den Awacati, den Worst, Talco pa Baby, y hasta den Cargamento di Carbon.