ORANJESTAD (AAN): Awe Diabierna 9 di September, e popular evento di nivel mundial, esta ‘New York Fashion Week’ ta cuminza na Merca.
E evento aki di varios dia, lo bay tin mas enfoque durante weekend, aunke e evento mes lo finaliza riba Diaranzon 14 di September.
Artistanan grandi lo bay ta presente pa admira e shownan aki, y e diseñadornan di nivel mundial tambe lo bay tey pa showcase lo ultimo di nan. Pero hunto cu esey, varios diseñador nobo ta haya chens di expone nan creatividad tambe.
Riba e potret aki por mira e dos beyezanan local di Aruba, esta Alexia Chin (man robez) y Charlena Clarinda kendenan a yega New York riba Diaranzon pa nan ta cla cu e tokenan final pa ta riba e pasarela di New York Fashion Week e fin di siman aki.
Nan lo bay ta modelando pa e cas di moda ‘Erasmus by Jairo’, su coleccion yama ‘Maximo Collection”. Anto hunto cu ‘The Society’ lo ta presentando na New York Fashion Week riba Diasabra 10 di September 2022, pa 5:30 pm.
Otro modelonan cu tambe lo ta participando cu trahenan di Erasmus by Jairo ta Zury Ruiz, Miriam Ramos Flores, Talisha Hernandez Brito, Yanielis Acevedo Mattei, Judit Trinidad Rivera, Leonardo Cruz, Alanis Fuentes Archilla, Jessica Rojas Maldonado, Sullianys Rios Rodriguez, Rafael Cruz Rodriguez, Tania Ojeda de Jesus, Danielys Ortega Rivera, y Ambar Pagan Sauri.
Alexia Chin a participa pa certamen di Miss Youth na Aruba, y a obtene titulo di ‘Miss Reina Internacional de los Mares y Turismo’ aña pasa na Costa Rica. Sharlena Clarinda tambe a yega di participa den Miss Youth, y despues na 2021 tambe a wordo corona como Miss Turismo Mundial.
