Di fiesta di Barbie y San Nicolas pa Dande y kima pensioen di Momo
*Un “Two in One”a baha Gobierno pa awor investiga kico Pueblo kier?
*Mike a priminti 700 Florin mas y awor ta puntra kico Aruba mester
ORANJESTAD(AAN)—Cu Aruba por a spera un alarma di horcan den mundo politico despues cu San Nicolas a subi cabay, bula den su barco y casi a lubida cu su saco a keda riba dak di un Penthouse, tabata evidente. Pero ni Aruba, ni Reino por a pensa, cu awor Mike y Gerlien lo a cuminsa cu loke aparentemente nan no a haci ora pa un motibo of otro, nan mester a adelanta eleccion.
Hasta Reino a presenta prueba palpabel, cu loke ta pasa awor na Aruba, no ta crea e impresion cu lo sigui traha riba e logronan di Gobierno Evelyn Wever-Croes.
Un Aruba cu durante ultimo añanan tabata acostumbra pa tur dia wordo informa di logronan nobo di e Gobierno saliente, awor tur dia ta wordo confronta cu portretnan di dos formador, cu den un sistema di “two in one”ta informa Pueblo di tur e charlanan informativo cu nan tabata tin cu un grupo tras di otro, pa asina forma Gobierno a base di deseo di Pueblo cu aparentemente prome cu eleccion nan no tabata conoce.
Tur dia Pueblo ta wordo presenta cu otro version di e storia di formacion cu mientrastanto a bira un buskeda di “con coy e pushi na su rabo”, cu aparentemente Pueblo mes no conoce pero peor ainda e dos formadornan mes no sabi ainda kico e lo contene.
Pueblo ta paga pa un proceso di formacion cu ta costa placa, cu mester bini di fondo publico, cu tur dia ta wordo presenta dor di “two in one”cu originalmente tabata “one den AVP” pero despues a bira “two”den AVP y loke a bira Futuro, pa awe ta “two in one”, cu e storianan di e encuentronan.
Hulanda mes a bati alarma pa un situacion, cu segun informacion cu DIARIO a ricibi, ta contene riesgonan importante pa Aruba cu mester sigui atende cu e problemanan cu “two in one”mes a crea y a laga atras pa Evelyn Wever-Croes a soluciona pa nan.
Informantenan ta indica cu e situacion mundial ta birando continuamente mas serio y cu mester tene cuenta cu Hulanda na e momentonan aki ta parti di e alianza Europeo den un situacion nobo y di tension mundial enorme den e crisis internacional di Oekraine.
Economia mundial ta en espera di shocks cu henter e situacion por produci directamente pa e paisnan mes, pa mundo, pero na un forma directo pa e mercado turistico y sigur economia mundial.
Preocupacion serio ta existi pa e hecho cu ainda ta dia 13 di Maart ta bay cerca Gobernador pa bay bisa con a forma e Gabinete Two in One, cu ta indica cu no tabata basa riba confianza for di inicio di e proceso di formacion entre Mike y su partido y Gerlien cu su partido aparentemente, loke a haci cu a dicidi cu pa forma un Gobierno mester di un “two in one”di Mike y Gerlien.
Ta normal cu pa baha uhn Gobierno tin prueba cu mester a baha e Gobierno. Den e caso aki awor ta trata na haya motibo pa splica pakico mester a baha e Gobierno cu a percura pa tin placa pa “two in one”por a haci e gastonan di forma un Gobierno.
Manera ta bini dilanti den discusionnan di Pueblo a wordo spera, cu nan a bolter situacion den Parlamento, pasobra nan tabata tin un programa pa ehecuta den cual nan mester a haya e poder atrobe, loke a bira posibel cu otro “two in one” cu ta Mike y Wendrick, mientras cu Geoffrey Wever a forma su “two in one”como Ministro di un partido y Miembro di Parlamento di otro partido.
Tur indicacion ta, cu kier alcansa e fecha di 18 di maart, pa bay uza placa di Pueblo pa celebra, cu loke a bari loke Pueblo a pidi pa 18 di Maart na 1948, for di mesa, por wordo celebra.
Pa tal ocasion, Pueblo mester lubida con na 1950 a manda separacion cas y a uni Aruba den un “two in one”cu resto di loke a bira Antillas Hulandes a base di historia colonial.
Preocupacion serio ta existi pa loke awor ta bini dilanti y pa e menaza di Reino cu lo deshaci di e trato special cu a duna Aruba pa motibo di Prome Ministro Evelyn y a haci cu Aruba por a haya un prestamo na un prijs mas abou cu loke originalmente Aruba lo a ricibi.
Awor si “two in one” pues Mike y Gerlien percura pa Aruba regresa na e specialidad di Mike pa gasta placa di Pueblo te ora Reino dal e “un tik op de vinger”, bahe for di Fort Zoutman of Penthouse, mester exigi su persona bisa unda e tin e placa pa paga 700 Florin extra na pensioen, warda.
Preocupacion serio ta existi pa e formacion di un Gobierno na Aruba, mientras Hulanda ta parti di discusionnan di Europa den un situacion mundial sumamente peligroso.
