ORANJESTAD (AAN): Bayendo bek den 2024, Aruba Tourism Authority (ATA) a tuma e tempo pa traha riba su di cuatro plan di maneho (“Business Plan”),
e di cuatro pues desde cu A.T.A. a inicia na 2011 como un entidad “sui generis” (independiente den esfera publico). Prioritiza ‘calidad di turismo’ ta sigui ta presente, mescos cu strategianan anterior, pero a amplia e accionnan y pone accento na pasonan cu ta rekeri atencion inmediato.
Aki ta reconoce cu hopi accion a wordo tuma ultimo añanan dor di varios gobernacion, pero simplemente mester bin cu cambionan mas agudo y grandi pa asina por logra ehecucion di ‘mas’ accion cu ta necesario y por bisa accionnan cu ta inclui algun ‘urgente’ pa asina guia e desaroyo di turismo, y di Aruba, den un direccion responsable y duradero. Aki ta reconoce alabez cu tin varios paso cu mester tuma pa remedia aspectonan cu durante añanan no a logra wordo encamina debidamente.
Ta subraya e hecho cu un ‘Aruba dushi pa biba y pa bishita’ ta un responsabilidad colectivo, di sector publico y priva y di e comunidad completo!
Aña 2024 a sigui inclui multipel accionnan dirigi na e desaroyo duradero di turismo. Importante pa resalta ta cu aña 2024 a conta cu continuidad di un demanda sumamente fuerte pa Aruba, cu a traduci su mes den entre otro crecemento record den entrada genera pa medio di turismo. No obstante preocupacionan di parti di e comunidad pa cu e presion cu e volumen di huesped ta pone riba Aruba, mester keda ta conciente cu e demanda fuerte aki no ta bin di mes y ta resultado di ‘hopi esfuerso’, di A.T.A., sector publico y priva. E demanda y desaroyo cu ta importante y vital pa nos tur! No mester “take it for granted” y mester realisa cu mester cuida esaki y cu e situacion por ta otro, principalmente considerando con sensitivo turismo ta. Covid-19 a mustra nos esaki. Mester tuma accionnan necesario, teniendo cuenta cu sentimento di nos comunidad y di nos huespednan, mester proteha y cuida nos turismo! Esaki ta algo di nos tur!
Year to Date 2024: Te cu December 2024, Aruba a ricibi un total di 1,421,616 huesped “stayover”, esaki ta un crecemento di 12.8% compara te cu December 2023, unda a ricibi 1,260,402 huesped “stayover”. Ora ta yega na lider den mercado, te cu December 2024, 79.7% di e huespednan ta di Norte America, 4.9% ta di Europa, 12.8% ta di Latino America, y 2.6% tabata procedente di otro partinan di mundo.
Estadistica conforme actualisacion den e industria di turismo: Tirando bista riba e
volumen (“stayover”) cu resultado di disminucion di 0.8% den December 2024 compara cu December 2023.
Conforme e demanda por bai mira tambe cu e aerolineanan lo sigui expande capacidad y asina permitiendo nos captura e demanda. Den December 2024, Aruba a ricibi un total di 128,240 huesped “stayover”, esaki ta un resultado di disminuicion di 12.8%, si compara cu December 2023, unda a ricibi 129,303 huesped “stayover”.
Mercadonan y categorianan di acomodacion: Den December 2024, 78.4% di e total di e huespednan “stayover” pa Aruba a bishita for di Norte America, 5.6% a bishita for di Europa, 13.1% a bishita for di Latino America y 2.8% tawata procedente di otro partinan di mundo.
Mirando e categorianan di acomodacion, den December 2024 -2.8% di huesped a keda den hotelnan European Plan, -6.5% a keda den hotelnan All-Inclusive, -6.3% a keda den Timeshare, y 7% a keda den otro tipo di acomodacion, incluyendo short-term vacation rentals (STVR).
Short-Term Vacation Rentals (STVR): A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs promedio pa anochi, e ocupacion y un calculacion di e entrada cu esakinan ta genera.
Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo. Esnan cu kier mira e rapport aki por bay na e website:
Si compara December 2024 cu December 2023 por wak cu e ocupacion promedio di e acomodacionnan aki a subi cu 0.8 punto di porcentahe, for di un promedio di 58.9% na December 2023 pa un promedio di 59.7% na December 2024.
Den caso di entrada, si compara December 2023 cu December 2024 por wak cu e categoria ta conta cu un disminucion den entrada.
