Dos ex-empleado di Colegio Arubano dunando apoyo na alumnonan

ORANJESTAD (AAN): Diabierna mainta net pafo di Colegio Arubano, por a mira cu dos ex-empleado stima na e scol tambe a

bin duna nan sosten pa e impasse cu tin aworaki entre Docentenan y SVOA, debi cu a suspende Rector di e scol net den siman importante di CP-week y SE-week.

   Como cu e docentenan no tabata presente e mainta aki, a nota cu ta un grupo grandi di alumno si a yega eynan tur bisti cu T-Shirt preto, como sosten pa nan Rector Tim Croes.  E momento ey no tabatin ningun docente presente, ni otro dirigente di scol.  DIARIO a nota con e ora ey, e ex-docente Alfredo Capelo tambe a dirigi su mes na e alumnonan pa yuda nan como guia.

   Ex-empleada Magaly Maduro kende tabata Trahador Social na Colegio Arubano, a bisa cu ta dos aña hendenan ta trahando pa drecha e Directiva di Colegio Arubano, y e siman aki el a culmina net den un siman unda e alumnonan no por a haci nan proefwerknan, siendo cu esaki ta un parti hopi importante den educacion di e studiantenan.

   Maduro ta lamenta cu no tabatin e chens, ni e espacio pa dialogo.  Un momento cu bo ta tende cu studiantenan ta wordo categoriza como ‘tercera parti’, esey ta algo di lamenta.  Pasobr anan ta esnan cu mas ta perhudica.

   Tin di corda riba derecho fundamental di mucha, cu tin derecho riba enseñanza, derecho di expresion, y derecho di bisa ora cu nan bisa cu nan no ta di acuerdo cu algo.

   Maduro ta lamenta esaki hopi.  E ta mira cu mr. Rosenstand ta un hurista/abogado, pues e sa derecho y leynan, y e tin di respeta nan.  E ta un abuso di poder, y esey ta algo cu pa principio Maduro ta contra dje.

   E ta mira presencia di e alumnonan pafo di Scol, como uno caminda nan kier expresa nan voz den henter e problema aki.  Y adultonan mester scucha nan tambe.

   E momento aki di incertidumbre tin consecuencia a termino largo riba e studiantenan.  Magaly Maduro ta haci suplica na SVOA pa nan ta madura, pa nan por sinta y combersa y sali for di e problema cu tin na Colegio Arubano.  Pasobra na final ta e alumnonan lo bay paga e cuenta aki.