Presidente di Parlamento di St. Maarten, señora Sarah Westcott-Williams:
ORANJESTAD (AAN): Señora Sarah Westcott-Williams, Presidente di Parlamento di Sint Maarten, ta na Aruba hunto cu e delegacion di Parlamento di St. Maarten pa participa den e Interparlementair Koninkrijksoverleg (IPKO). E representantenan di e cuatro paisnan den Reino Hulandes, Sint Maarten, Corsou, Aruba y Hulanda, a bin hunto e siman aki, y desde awe e reunionnan a cuminsa y lo termina diasabra 21 di februari.
Den un entrevista recien na Aruba, el a remarca cu e delegacion lo tin varios dia di trabou intenso. E sesionnan di IPKO lo cuminsa prome, sigui pa e reunion tripartiet entre Aruba, Corsou y Sint Maarten. Durante e consultanan aki lo pone riba mesa diferente asunto importante cu ta toca tur pais den Reino.
Un prioridad importante pa Sint Maarten, el a agrega, ta pa sigui fortalece e relacion entre e cuatro paisnan, specialmente entre e Parlamentonan di Caribe y Parlamento Hulandes. “Aunke tin un Conseho di Minister di Reino, no tin un parlamento di Reino. P’esey, IPKO ta un plataforma esencial pa discuti asuntonan cu ta di interes comun”, el a expresa.
Temanan principal ta inclui desaroyo geopolitico cu ta impacta region di Caribe, reto socio-economico manera vergrijzing, y e discusionnan continuo tocante e sistema di solucion di disputa (Schillenregeling). El a infatisa: “E reunionnan tin como meta pa intercambia miho prakticanan y sigui construi un Reino mas solido y colaborativo”.
