Cantidad di Canades y Europeo a stop di viaha pa Merca

Di Canada so Merca ya a perde 4.5 biyon Dollar di entrada

• Barconan crusero ta uzando Caribe como ‘homeport’ 

ORANJESTAD (AAN): Un analisis recien haci riba data di reservacion di pasashi for di Europa pa bishita Merca pa luna di Juli 2026 venidero, a mustra cu el a cay drasticamente, compara cu Juli 2025.  Ta mustra claramente cu hopi persona cu den pasado tabata viaha regularmente pa Merca pa pasa vakantie, awor ta cambiando di opinion.  Desde 2025 caba asientonan den avion a cuminza bira bashi.

   Pero no ta di Europa so, pasobra aña pasa na Mei 2025 den henter Orlando, e cantidad di turista procedente di Brasil tabata asina hopi, cu tur caminda cu bo cana den Disney World of Shopping Malls na Florida... ta idioma portugues tabata tende.  Pero awor cu President di Merca a impone un tarifa extra di $250 pa cada persona cu busca un Visa Mericano, e ta mustra cu Brasile؜ñonan ta buscando lugar alternativa pa bay pasa nan vakantie.

   Canada: Ciudadanonan Canades ta esnan cu mas a stop di bula pa Merca, y e motibonan ta hopi claro.  Nan ta teme cu si nan viaha pa Merca, nan tin di duna tur clase di informacion na CBP ora di yega frontera, y e peligro di wordo gara pa oficialnan brutal di ICE di Inmigracion, cu por detenebo pa cualkier excusa, y lagabo cera pa varios luna.  Manera cu a socede cu monton di Europeo, Mexicano, Guatemalteco, Venezolano, Cubano, y hasta ciudadanonan di Jamaica y di Barbados, tin cu tin ya 6 luna cera sin cu sikiera a presenta dilanti Hues.

   Canadesnan a stop di viaha pa Merca, cu aerolineanan manera Air Canada, WestJet, y Air Transat ta viahando pa Merca cu asientonan bashi.  Air Transat cu tabatin 16 vuelo semanal di Canada pa Florida, ya caba awor ta bulando cu 3 vuelo semanal so, y dia 13 di Juni 2026 nan lo bula e ultimo vuelo di Montreal pa Florida.  WestJet a elimina vuelo pa 8 ciudad Mericano, y envez di esey awor ta aumentando viahenan pa Caribe y Centro America.

   Tur esey debi cu simplemente no tin pasahero viahando pa Merca.  Canadesnan a dicidi cu tin otro lugar mas atractivo pa bishita durante winter.  Tur hende ta teme cu nan lo wordo trata masha mahos na CBP ora di drenta Merca, of door di ICE riba caya, y ta disgusta cu president di Merca lo kier converti Canada den estado #51 di Merca.

   E ausencia di Canadesnan na Merca, ya caba a pone tur empresa turistico na Merca y comercio en general, e suma di 4.5 biyon Dollar.  Tur esey a bay perdi.  Tambe cu cancelacion di monton di vuelo, a perde 450.000 asiento.  Statistica ta mustra cu 62% di Canadesnan a stop di cruza frontera pa Merca.  Esey ta sin menciona e cantidad di producto y licor Mericano cu ya no ta wordo cumpra ni importa mas na Canada.

   Envez di esey, awor Canadesnan ta viahando na gran escala pa e.o. Cancun (Mexico), Belize, Costa Rica, Republica Dominicana, Portugal, Curaçao, y resto di Europa y grandemente pa Asia.  Mayornan cu kier a hiba nan yiunan pa Disney World na Florida of Disney Land na California, ta bulando awor pa Paris pa bishita Disney Paris.

   Canadesnan ta bendiendo nan vakantie-huis na Florida y Arizona na gran escala.  Ultimo lunanan e beachnan na e.o. Tampa, St. Petersburg, Sarasota, etc., ta bashi y casi no tin hende.  Varios restaurant den area di Tampa ta cerando.  Na Key West tambe negoshinan cu tabatin hopi decada operando, ya a cera nan porta.  Turismo pa Las Vegas a cay enormemente.

   Cruseronan cu cambio: Companianan crusero tambe ta sinti efecto pisa, principalmente cu nan barconan cu ta uza un waf Mericano como ‘homeport’, e.o. saliendo di Miami, of Fort Lauderdale, of Cape Canaveral, of San Juan (Puerto Rico).

   El a bira asina drastico, pasobra tin hopi Europeo y Canades cu kier bay riba viahe crusero, pero nan ta nenga di subi e barco na un Waf Mericano.  Recien tabatin e caso na Florida, ora cu na waf, e agentenan di ICE a subi abordo, y saca un pasahero cu man na boei y baha bay cu ne.  E pasahero masculino aki a resulta di ta un ex-funcionario di US Coast Guard.   Despues di 3 ora cu esnan di ICE a ripara nan eror, nan a lag’e bay sin sikiera ofrece disculpa ni nada.  E pasahero aki a wordo entrevista pa TV na Arizona, unda cu lagrima na wowo el a papia di e humiyacion enorme con tur hende ta mire den barco ta wordo escolta cu man na boei.

   Pesey awor na e.o. Barbados, tin varios barco cu a cuminza uza e isla como “homeport”.  Vuelonan for di Europa ta sigui yega yen-yen na Barbados pa asina e pasaheronan por subi nan barco crusero eynan.

   E isla di Curaçao tambe aworaki ta “homeport” di crusero di Corendon, y pesey tin hopi vuelo for di Europa ta yega eynan pa pasaheronan subi e barco na Willemstad.  Tin indicacion cu e trend aki lo por bay aumenta, y mas barco lo cuminza uza waf di Caribe pa nan viahenan crusero.

   Europa: Con debil vuelonan for di Europa ta pa Merca, por mira for di statistica cu ta indica cu reservacion di pasashi a cay cu 14.2%.  E data aki ta mustra di ta alarmante pa Aerolineanan cu a agrega extra capacidad pa lunanan di Juli y Augustus venidero, relaciona cu FIFA Copa Mundial 2026.  Casi no ta mira nada extra di reservacion, y hendenan ta pensando si acaso ta poco fanatico di Europa ta viahando pa Merca pa apoya nan seleccion nacional den futbol.  Nan ta spera cu na ultimo minuut lo tin hende cumprando pasashi.

   E analisis aki a bin como un sorpresa grandi, pasobra semper Copa Mundial di Futbol ta e evento mas popular riba e planeta.  Semper Europeonan ta acudi na gran escala pa e weganan, mirando cu 16 di e 48 ekiponan participando den e Copa ta procedente di Europa.

   Reservacion di pasashi pa Juli 2026 for di Amsterdam, a cay cu 23%.  For di Frankfurt a cay cu 36%.  For di Barcelona a cay cu 26%.  For di Munich a cay cu 19%.  For di Atenas a cay cu 19%.  For di Madrid a cay 15%.  For di Dublin a cay cu 15%.  For di Milan a cay cu 8%.  For di Roma a cay cu 5%.

   Europeonan tambe ta teme cu e hecho cu nan tin di duna tur nan informacion personal di social media, y wordo interoga pisa door di CBP of keda deteni riba caya door di ICE... ta e factor mas importante cu nan ta prefera di keda nan pais y wak e Copa Mundial via TV.