Tarifa ta subi entrante 1 Augustus 2024
- Nan no tabatin intencion di hisa prijs
- Pa por cumpli cu ley nan ta obliga di haya extra gasto
ORANJESTAD (AAN): Manera por a lesa den otro articulo, e Ley di Kinderopvang ta bon bini cerca tur Centro di Cuido di Mucha na Aruba. Pero debi na cierto aspectonan cu nan tin di bay cumpli cune, pa por funciona segun e ley ta exigi, lo tin di haci cambio. Y e cambionan aki nifica cu tin placa envolvi. Consecuentemete esey nifica cu lo bay hisa tarifa pa ora bo ta hiba muchanan keda na Crêche.
E otro articulo a menciona cu e motibo principal, ta e exigencia di ‘ratio’ di cuanto mucha pa cada leidster.
Segun Marelyn Martijn a splica, durante reunion cu e doñonan di Centro di Cuido, nan a trece dilanti cu pa nan tur por cumpli cu e exigencianan di ley ta bin varios gasto extra.
Gastonan extra aki ta pa e.o. infrastructura, inverti, material, extra personal y sin conta cu tambe durante tur e añanan aki salario a subi, awa y coriente a subi, y tambe costo di comestibel cu nan ta usa pa alimenta muchanan.
Pa tur e motibonan aki, tur Centro di Cuido a dicidi cu nan tin di subi nan prijs. “Nos no por cubri tur e gastonan cu ta bin acerca cu e suma mensual cu nos ta cobrando pa cuido di mucha na e momentonan aki,” Martijn a indica.
Esey nifica, cu entrante fecha 1 Augustus 2024, prijsnan di centro di cuido lo subi.
Cada centro lo stipula su prijs basa riba su gastonan individual pa maneha su centro.
E aumento di prijs lo worde introduci den fase y no completo den un biaha.
Cada centro lo avisa mayornan di adelanta e suma y durante ki lunanan di e aña lo worde subi.
DIARIO a compronde cu algun Centro a cuminsa avisa mayornan caba y algun ya a cuminsa haci aumento di prijs. Lo bay tin foyeto cu nan lo comparti cu mayornan cu informacion di aumento di prijs. Toch a compronde cu no tur centro lo haci e cambio aki. Algun centro no ta worde perhudica door di e cambionan aki y pa awor a dicidi no haci cambionan, pero gran mayoria di centro na Aruba si ta worde perhudica y ta sinti obliga pa haci e aumento di prijs pa por cumpli cu tur exigencianan di e ley.
Esnan cu mas ta worde perhudica mas ta e Centronan cu ta cobra un promedio di 350 Florin pa 500 Florin mensual pa muchanan cu ta keda full dia, of 200 Florin pa 350 Florin pa mitar dia/traimerdia.
Nan preocupacion: E doñonan di centro di cuido ta preocupa cu e aumento di prijs.
Nan kier pa pueblo sa cu ningun momento tabata nos intencion pa subi prijs pero nan no tin otro alternativa. Djis cu nan tin di bay cumpli cu exigencianan di ley.
Nan ta na altura cu gran parti di mayornan tin un entrada di minimum loon y si tin 2 of 3 yiu ta bira pisa pa nan paga cuido pa nan yiu. Tambe nos ta consiente cu algun mayor no lo afford di paga centro di cuido mas.
Nan no kier pa muchanan mester di keda na kas nan so of ta di un man pa otro paso mayor no por paga cuido pa nan yiu mas. Nan no kier pa nos muchanan worde perhudica door di e cambionan aki cu mester worde tuma pa por cumpli cu ley.
Na hulanda un Centro di Cuido ta un promedio di 10,25 Euro pa ora cu ta mas o menos 20.10 Florin pa ora.
Actualmente na Aruba e promedio cu un centro di cuido ta cobra pa luna ta entre 1 pa 2 Florin pa ora.
