ORANJESTAD (AAN)-- Docentenan di Colegio San Antonio, a culmina e trayecto di recapacitacion 21st Century Skills.
E programa aki, bou guia di Annette Mfuidiman di Rolf Groep, a cuminza na 2022 y a finaliza recientemente.
Meta di e curso ta pa ekipa nos docentenan cu herment pa prepara nos alumnonan cu habilidadnan pa nan futuro.
Un total di 21 docente a ricibi nan certificado. Directiva di Scol ta yama pabien na e docentenan aki y ta desea cada un di nan exito y ta encurasha nan pa pone tur loke nan a siña den practica. Di parti di DIARIO tambe, hopi pabien!
Hopi bunita ehemplo pa otro scolnan tambe y den tur tereno di trabao, capacitacion ta sumamente necesario, y mas ainda den un epoca unda e tecnologia ta avanza cu stapnan gigantesco, y a bira practicamente indispensable, desde e trabaonan mas simple te esnan di mas complica y di profesionalismo halto, pasobra “nunca un hende ta stop di siña y no por bira lomba mas pa innovacion”.
Awendia mundo ta avanzando mas y mas den inteligencia artificial cu riba su mes hasta a bira un competencia den e mercado laboral y tur tereno.
Hopi bon cu Colegio San Antonio ta duna recapacitacion di docente e importancia cu e tin y merece, y ohala cu nan ta e pioneronan cu lo start e punto di salida pa tur otro scol y instancia sigui nan ehemplo, pa Aruba en general sigui progresa y bira un ehemplo di avance y progreso pa henter mundo.
