El a fayece tragicamente riba lama na Aruba
ORANJESTAD (AAN): Un relato cu a wordo publica riba NBC Boston a informa di e desgracia cu a sosode e siman aki ora cu un mucha muher di apenas 13 aña a fayece na lama durante su vakantie na Aruba.
Segun NBC Boston: "Un adolescente de Milton, Massachusetts, a muri den un accidente di navegacion mientras e tabata di vacacion cu su famia na Aruba, asina a confirma diabierna e autoridadnan di su scol.
Cassidy Murray, studiante di Buckingham Browne & Nichols en Cambridge, a muri diaranson, e directora di e scol Jennifer Price a bisa den un carta dirigi na e comunidad escolar.
"Cassidy a dentra Middle School e aña aki como studiante di 7º grado, a base den parti di e fuerte recomendacion di su ruman homber Adam, un studiante di 10º grado di BB&N cu a uni na e Middle School cuater aña pasa. E no a perde tempo den crea su propio marca unico den e campus di MS", Price a bisa den su carta.
"Su sonrisa semper presente, su harimento contagioso y su personalidad optimista tabata uni cualkier grupo den cual e tabata forma parti. Su compañeronan di klas tabata sinti atrai pa su amabilidad genuino y su modestia trankil. Su amigonan tabata sa for di e prome siman di les cu e lo ta un confidente calido y di confianza c'un gran sentido di diversion y camaraderia".
Price a bisa cu Cassidy tabata conoci pa asumi retonan nobo, manera e les di teatro of hunga hockey e winter aki pa prome bes. Tambe a pasa hopi aña participando den gimnasia.
"Nos tur tin famia Murray -Linda, David y Adam- den nos pensamento y curazon", a continua. "Na e momento aki, mientras nos tur ta lucha pa duna sentido na e noticia tragico aki, nos mester apoya un na otro, y specialmente na e compañero y amigonan di Cassidy y Adam, mientras nos ta nabega a traves di e compleho proceso di haci frente na nos dolor".
Price a indica cu e scol tin premira habri di 10 a.m. pa 12 p.m. diasabra pa e studiantenan y mayornan por pasa y papia cu e conseheronan profesornan y asesornan.
"Cu tragedianan sin sentido manera esaki, e berdad ta cu no tin un manera universalmente 'corecto' di afronta e situacion", a bisa. "Cada un di nos, adulto y hobennan, cu ta wordo afecta pa e noticia tristo aki, lo tin cu yora y procesa na nan manera. Loke si mi sa di e comunidad di BB&N ta esaki: Nos lo tey, na nos manera, pa brinda un man of oido na cualkier cu ta luchando, pa duna nos apoyo mutuo y pa mantene famia Murray den nos curazon, pensamentonan y oracionnan den e dianan y simannan benidero".
Manera ta conoci, Diaranson atardi un poco prome cu 4:00 pm, e tragedia aki a pasa cu Cassidy Murray kende a sali cay durante e asina yama 'Tubing' y a cay den lama. Pa su malasuerte, un boto a pasa y a dal riba e dama hoben aki, lagand’e bastante herida. Algun rato despues el fayece, apesar di tur esfuerzo cu a wordo haci door di paramediconan pa reanim'e.
