ORANJESTAD (AAN): Directora di SKOA, Anuesca Baly a emiti diabierna un comunicado di prensa unda e ta reacciona riba declaracionnan reciente di ex Minister Lampe.
"Pa bisa berdad, SKOA kier a sigui e ehempel di minister Endy Croes, pa no reacciona riba e reciente declaracionnan di ex-minister Lampe. E indole di e reaccionnan, sinembargo, ta obliga nos un biaha mas, pa pone e puntonan riba e i-nan den e problematica di nos werksternan.
Asina SKOA ta puntra su mes con minister Lampe lo a prefera di mira esaki den e periodo di 2016 te cu 2020. Paga e werksternan ‘segun ley, manera SKOA tabata haci na 2015’, ta nifica pues cu e scolnan no tabata wordo haci limpi manera debe ser. Ta exactamente na esey e Ministeriële Beschikking (MB) di minister Hooyboer na 2015, kier a pone un fin. Of e lo a prefera pa SKOA ya caba na 2016, hisa e schoolgeld?
E punto specificamente ta: e hacimento limpi di scolnan catolico ta costa mes hopi cu e hacimento di scolnan publico. Nos werksternan no ta come menos cu e otro werksternan. Pues, si pa nos scolnan tin menos placa di subsidio, e ora e mayornan mes tin cu paga e diferencia.
Kisas bo ta puntra bo mes con otro fundacionan di scol ta hacie. E contesta ta simpel: door di pidi un suma mas halto cu e schoolgeld di SKOA. Un scol por ehempel ta pidi 350 florin pa kleuterschool y 400 florin pa basisschool. Un otro ta pidi 525 y 575. Y un di otro banda, ta pidi hasta 700 florin pa tur dos. Incluso e scolnan publico di kleuter y basis, na unda e werksternan ta wordo paga como ambtenaar, ta pidi 200 florin, pues 25 florin mas hopi cu SKOA.
SKOA, semper tabata consciente di su responsabilidad pa asina tanto scol den barionan situa riba henter e isla, pero solamente por a mantene e schoolgeld asina abou, como cu gobierno tabata dispuesto pa paga tambe pa e werksternan. Si gobierno no kier haci esey mas, e ora nan ta manda en realidad e mensahe: “Mayornan, di awo padilanti, boso mes mester bay pag’e.”
Señor Lampe un biaha mas ta omiti e echo cu tabata su propio Directie Onderwijs, cu na 2016, a pidi SKOA pa hinca e werksternan den e sistema salarial di gobierno. Y tambe cu Directie Financïen a colabora activamente cu esaki. Ora cu el a haya sa esey, pa un momento el a keda sin palalabra. Tabata trata aki di un ‘atake organisa riba caha di gobierno’? Of di un ‘eror humano’? Pa SKOA si e tabata tin palabra: SKOA a procede ilegalmente y mester paga henter e suma bek.
Di cua suma e ta trata realmente?
No ta paga subsidio di salario na Stichting, pero directamente na e trahadonan. Pues, hasta si esaki no a sosode segun ley, cada cen cu a gasta a bay na un salario modesto pa nos werksternan. Nada no a disparce, y niun caminda a fiesta.
Pero kico a pasa realmente na 2016?
Aki diferente instancia a traha hunto bou di e suposicion sincero cu e MB di minister Hooyboer a nifica cu nos werksternan lo wordo paga mesun manera como werksternan na scolnan publico. Si e minister responsabel (desde november 2017 esaki tabata minister Lampe mes) a adverti esaki prome, e ora nos lo por a actua na e momento ey. SKOA no tin acceso na e caha di gobierno. Tur luna SKOA ta haci un peticion pa e pago di salario, y e instancianan concerni ta evalua y aproba (of desaproba) un peticion asina.
Pues, SKOA no ta saca placa for di e caha di gobierno, SKOA ta haya placa for di caha di gobierno. Y prome cu SKOA haya e placa ey, e tin cu wordo controla na nomber di e minister. E pregunta ta pues: ken realmente a actua fuera di ley?
E contesta ta: hues no ta duna declaracion en absoluto tocante esey. E palabra ilegal, ‘onrechtmatig’, no ta aparece den henter e veredicto. Tampoco hues ta condena SKOA na pagamento bek di salario. Esey ta minister Lampe mes a inventa acerca.
Si, en berdad ta e caso, cu hues a permiti minister Lampe pa por lo pronto ubica gasto di limpiesa di e scolnan atrobe bou di gastonan operacional. Pero si e kier lo miho pa e mayornan, pakico e no a hisa e suma pa gasto di operacion? Pa asina sikiera scol di nan yiunan ta wordo haci limpi manera debe ser.
E contesta naturalmente ta cu esaki pa minister Lampe tabata simplemente un calculacion pa corta gasto. E ta orguyoso di a spaar no menos cu 25 miyon riba enseñansa. Esey por, pero admiti tambe cu di esey bo a kita cuater miyon di nos werksternan. No haci manera awor bo ta para na banda di e mayornan, pasobra no ta asina.
Desde januari 2020, en berdad, e werksternan no ta wordo subsidia manera antes. Esaki ta nifica cu nan ta haya un ‘salario netto’, pero e placa cu SKOA, como dunado di trabao, mester haya cada luna pa paga e primanan corespondiente, no ta wordo ricibi mas.
Pero kico SKOA por a haci?
E tempo ey SKOA por a kita e werksternan inmediatamente y cera e scolnan, pasobra sigui den scolnan sushi, esey no tabata un opcion. Pero for di tur banda a pidi SKOA pa no haci esey; tene pasenshi, tin un solucion na caminda.
Y efectivamente, na juni 2021 porfin e solucion a yega: un carta di minister-president. Nada di un carta con cu ta net prome cu eleccion, pero un confirmacion por escrito den cual ta indica cu Conseho di Minister (Ministerraad) lo cumpli cu un conseho formal, redacta pa mediado di gobierno despues di delibaracion cu ministerio di Asunto Social y Labor y sindicato SEPPA. Pues un documento importante.
E echo cu mientrastanto 9 luna a pasa den cual nada no a pasa, esey ta haci nos naturalmente desespera y rabia. Banda di esey, cu inscripcion pa e aña escolar nobo dilanti porta, no a keda otro opcion pa hisa e schoolgeld, si a lo menos nos kier pa nos scolnan keda habri y ta wordo haci limpi.
Sabiendo cu esaki ta un medida drastico, nos a informa e representantenan di pueblo prome. Kisas ainda nan por a caba cu e inseguridad y inhusticia aki. Awo ta depende si Parlamento ta drenta den accion of ta laga nos pa nos cuenta. ‘Nos’, no ta solamente nos werksternan, pero tambe director di scol, docente, alumno y mayor. Esaki ta casi 30.000 hende hunto, o sea, un di cada cuater habitante di nos isla.
Naturalmente e ex-minister a bolbe purba impedi esaki: “Kico cu boso purba, ley ta prohibie!”, esey ta loke e kier men.
Ta bon cu cos no ta bay asina. Aki e pueblo ta e hefe, y ta representa den parlamento. Ey ta traha ley, y ey ta tuma medida, si ta necesario, pa coregi cosnan cu no ta bay bon. Niun ex-minister por stroba esaki.
Mientrastanto SKOA no ta para keto. Hunto nos ta traha na un areglo di pago pa mayornan y un fondo social pa alumnonan. Di ki manera cu esaki lo caba, nos lo haci tur cos den nos alcance pa mantene mas tanto mucha y alumno na nos scolnan.
Frere Bonifacius a funda Stichting Katholiek Onderwijs Aruba (SKOA) na januari 1971. E stichting ta maneha 46 scol: 15 kleuterschool, 26 scol basico di cual 1 pa enseñansa special y 5 mavo. SKOA tin, banda di 46 director y 600 docente, cu ta duna les na 9.500 alumno, tambe 110 empleado, incluyendo 85 werkster".
