Divi ta un di e resortnan cu durante e temporada di pandemia a sa di mantene nan empleadonan na pia di trabou

Minister Dangui Oduber

ORANJESTAD (AAN): Diaranson mainta Minister di Turismo sr. Dangui Oduber a ricibi un recorido y conoce un poco mas di e operacion di e hotelnan di Divi Resorts. Divi ta un di e resortnan cu durante e temporada di pandemia a sa di mantene cada un di nan empleadonan na pia di trabou.

            E Director General sr. Marin Bijl a duna di conoce cu Divi Resorts no a spera cu e recuperacion di nos turismo tabata asina bon, e la menciona cu solamente e prome cuartal di aña 2022 tabata poco keto. Minister Oduber a ricibi tambe un presentacion di e General Manager di Divi Village Golf & Beach Resort sr. Ferry Zievinger. Hunto cu sr. Freddy Zedan, Director of Hotel Operations, Minister a pasa un mainta ricibiendo hopi informacion.

            Tabata un reunion ameno unda a elabora riba e grado di ocupacion di e hotel. A menciona cu e resort tin un grado di ocupacion di 95% pa 100% henter aña pa 15 aña caba. Ya pa 20 aña caba e resort ta uzando e mesun strategia/modelo di menos ocupacion y prijsnan mas halto. Es decir no ta traha mas camber pero ta busca e turista cu ta gasta mastanto, enfocando cu e turista semper ta haya e valor pa su placa. Tambe a ser menciona cu 60% di Divi su clientenan ta bolbe bek. E resortnan ta ricibi mas tanto turistanan di Merca y Europa (Belgica, Alemania y Hulanda).

            E mandatario a keda poni na altura cu na aña 2024 Divi Resort ta planea pa cuminsa cu renovacion di 45 di nan cambernan cu tin mirada pa nos playa. Un inversion grandi di $20 miyon dollar cu tin e meta pa sigui atrae e clientenan cu mas ta gasta den nan resortnan. Tambe Divi a haci un inversion alrededor di $250 mil dollar pa combati e corosion di nan beach na momento cu esaki a perde basta santo blanco. Lamentablemente e esfuerso aki a bay den vano como cu madre tera a tuma su lugar bek.

            Locual ta sorprendente ta e con e ambiente di trabou ta pa e empleadonan, tur cu Minister Oduber a topa tabata contento cu nan trabou. Bou e maneho di Divi e empleadonan (alrededor di 1000) tur aña ta haya un aumento di salario. Nan tin un modelo caminda semper nan ta duna bek na e empleado, por ehempel mehora un cafetaria pa nan empleado. E resultado di esaki por mire riba e porcentahe di satisfaccion di e huespednan cu ta 4.6 di e 5 di e experiencia con bon e turista ta pasa na e hotel. E comentario mas grandi ta cu Aruba ta hopi servicial. Ora bo empleadonan ta contento semper bo ta haya bunita resultado, e mandatario ta expresa.

            Finalmente despues di e bishita minister Dangui Oduber por bisa cu siguridad cu tin trabounan den nos sector turistico cu por haci un carera di dje y crese. Divi Resort sigur ta un di e hotelnan pa considera. E mandatario ta gradici tur e empleadonan cu a ricibie calurosamente den nan segundo cas.