Divi Resorts a introduci Payroll Pro App exitosamente na tur empleado

No ta usa papel mas encuanto salario

ORANJESTAD (AAN): E famia di hotelnan Divi ta un di e dunador di trabao mas grandi na Aruba cu un total di casi mil empleado. Recien e compania a organiza algun dia di presentacion na e Ballroom di Alhambra pa asina introduci e “Payroll Pro App”. Durante e sessionnan aki tur empleado por a registra y siña traha cu e aplicacion. E introducion tabata na encargo di Theo Geerman di e compania VCC, distribuidor di e programa.

   “Pa por cumpli cu e demanda di e mundo digital cu nos ta biba aden ta necesario pa haci uzo di e tecnologia pa asina garantisa cu procesonan ta bay mas liher na beneficio di nos trahadonan,” segun Maria Esguerra, Director di Recurso Humano pa hotelnan Divi.

   Via e app nobo aki empleadonan por entre otro pidi vakantie den forma digital via nan cellular na lugar di yena papel manera cu tabata worde haci antes. Algun otro beneficio cu e app aki ta ofrece ta cu e trahado lo por mira tur su salario den forma digital caminda e lo por mande hopi facil via email, na un banco of cualkier otro instancia cu por pidi pa copia di salaris por ehempel ora di busca hipoteca. Otro beneficio cu e app aki ta ofrece ta cu empleado lo tin un bista total riba e cantidad di dia di vakantie cu e tin acumula, tambe tur empleado lo por comunica directo cu esnan cu ta traha cu recurso humano, y hopi otro beneficio mas.

   Ta bon pa menciona cu e introduccion di e portal y aplicacion aki a tuma lugar den fase, caminda prome tur managernan a participa den introduccion pa asina por experiencia con e producto ta traha, pa motibo cu nan ta esun cu mester bay aproba entre otro e peticion di empleadonan pa vakantie.  E “Payroll Pro App” ta accesibel tanto riba “Apple Store” y “Google Play”, anto e ta agradabel y hopi facil pa traha cu ne riba bo cellular. Tur manager di recurso humano lo keda disponibel semper pa contesta cualkier pregunta & duna asistencia na tur empleado.

   Hotelnan Divi tin hopi aña ta usando Payroll Pro HRM, cual ta un programa cu ta ofrece un cantidad di opcion y servicio, y ta contento cu por amplia riba e pakete cu e programa ta ofrece cu e introduccion recien di e “Payroll Pro App”.