Vicepresident di Parlamento, Muzaninn Wever :
ORANJESTAD (AAN): Den entrevista recien cu DIARIO, Vicepresident di Parlamento, Muzaninn Wever a toca e topico di pobresa na Aruba y con Gobierno di Aruba ya caba ta trahando pa hisa calidad di bida di nos pueblo.
Parlamentario Wever a remarca cu e pilar economico di Aruba ta basa riba turismo cu ta un industria di servicio caminda cu tin rangonan di posicionnan halto cu salarionan hopi halto mientras cu e resto di trahadornan ta cay den un categoria hopi mas abou. E Parlamentario a agrega cu mester balansa entrada di esnan cu ta biba na nivel mas abou economicamente pa asina nan calidad di bida tambe por ta mas halto sin cu nan mester biba di paycheck pa paycheck. Mester wak con ta acopla esaki den nos sistema.
Banda di esaki, tin plannan pa diversifica nos economia pasobra Aruba no por keda basa su mes solamente riba e industria di duna servicio si esaki ta mantene nos pueblo den un pobresa. Aruba ta un mercado hopi chikito y ta wordo afecta entre otro ora un doño di trabou hisa salario di trahadornan, automaticamente prijs di producto tambe ta subi. E pueblo cu ta bay cumpra ta bay paga mas hopi. “Esaki ta bira e ora manera un domino effect di gasto pa gasto. Pero ainda nos tin hopi trabou pa haci. Gobierno di Aruba ta tratando pa trata na mitiga y asisti caminda cu por. Obviamente tin un trayecto hopi largo pa bay”, Wever a expresa.
Parlamentario Wever a remarca cu ainda falta un difinicion oficial di kico ta pobresa Haciendo esaki, por categorisa ken ta cay bou di e nivel di pobresa. Si compara nos sistema cu otro paisnan, Aruba su sistema social ta carga nos pueblo generalmente bon y ta yuda mitiga problemanan di pobresa. Entre otro, nos tin cuido medico cubri, SVb ta cubri dianan ora perde trabou of bira malo.
Apesar di esaki, Parlamentario Wever e enfatisa, gastonan ta halto y Gobierno di Aruba ta trahando riba esaki pa mitiga e prijsnan halto por ehempel den supermercadonan. Por ehempel ta pensando pa trece carni for di Colombia na prijs hopi mas economico. Tambe ta trahando riba oportunidadnan pa produci cuminda localmente cu tambe lo por yuda baha gasto teniendo cuenta cu no mester paga gasto di transporte entre otro mientras ta haya cuminda hopi mas fresco.
“Mi ta kere tur e stapnan aki obviamente tur hende kier e awe pero esakinan ta rekeri tempo y den Presupuesto 2026 lo atende cu esakinan unda cu tin placa destina pa hopi inversion cu lo yuda contribui na alivia e nivel di pobresa na Aruba”, Vicepresident di Parlamento, Muzaninn Wever a termina bisando.
