Diseñadora Quiana Cronie di Aruba a presenta su trabao na Dutch Design Week

ORANJESTAD (AAN): Informacion for di Hulanda ta indica cu e diseñadora prometedor di Aruba, esta Quiana Cronie, ta presentando su obranan durante Dutch Design Week na Eindhoven.  

Esaki ta e evento mas grandi di diseño di Nort Europa.  E festival di diseño aki cu ta dura 9 dia, ta trece e trabao y concepto di mas di 2.600 diseñador pa mas di 350.000 bishitante for di Hulanda y di exterior, entre cual e Cashaca di Quiana Cronie.

   Mediante e creacion di moda sostenibel y a naracion visual, Quiana di 27 aña di edad ta trata di preserva e cultura di Aruba pa futuro generacionnan.  E ta haci investigacion riba e bistirnan tradicional di e isla, y ta wordo influencia pa diferente cultura debi na e colonizacion y comercio.  “Mi kier expone, comparti y pone spotlight riba nos historia, cu hopi biaha ta wordo lubida,” ta loke Quiana a indica.

   “Manera e origen di e dicho Arubiano ‘Come hariña, bisti bari”.  Esey ta referi na un camisa di trabao corta straight cu e muhernan trahador, e agricultornan, y piscadonan tabata traha cu saconan bashi di hariña alrededor di añanan 1800, cu tabata resistente y ta pasa aire door di nan.  E reuso di e material fuerte aki a haci cu Cashaca a bira un bistir sostenibel.”   El a sigui bisa: “Cu mi proyecto actual, Cashaca, mi kier rebiba e tradicion rico ey.  Inspira door di e metodonan di e epoca ey, el a crea un version recicla usando paña di mesa di catuna, cu mi a haya segunda mano for di industria di Hotel.”

   “Asina mi ta referi na e actual y ainda no hopi sostenibel Aruba di awendia, unda e principal fuente di entrada ta turismo.  Tanto e souvenirnan como tambe moda ta wordo produci mayoria vez na forma masal, rapido pafo di Aruba.  Door di renoba e Cashaca den un spotlight nobo, e kier centraliza riba e patrimonio, e identidad, y e pertenencia di e habitantenan.  Di otro banda, Cashaca ta un forma di transmiti storianan no conta di Aruba, via di bistirnan sostenibel, cu ta destina pa tur hende.

   Quiana Cronie desde su 19 aña di edad a bandona e isla, y a bay Hulanda pa studia na Design Academy na Eindhoven.  Aña pasa Quiana a bin bek Aruba, unda el a diseña su coleccion nobo sostenibel cu ta contribui na e conservacion di storianan cultural.  Esaki tabata posibel danki na e beca di talento di Stimuleringsfonds Creative Industrie.

   E potretnan aki ta pa cortesia di fotografonan Lici Feng, y Patricia Cronie.