ORANJESTAD (AAN): Diaranson anochi, Bispo di Pasco, Gobernador Alfonso Boekhoudt di Aruba a ofrece su Discurso di Pasco y tambe Fin di Aña na comunidad,
den cual el a describi 2025 como un aña cu a afecta comunidad fuertemente pa e perdida, luto, y eventonan dramatico, pero tambe via momentonan di solidaridad y orguyo comparti. Gobernador ta haci suplica na comunidad pa comberti e lesnan siña durante aña aki, pa crea mihor solidarismo, husticia, y cuido pa tur hende. Aki DIARIO ta trece e discurso completo di Gobernador.
E discurso: Tur aña e storia di nacemento di Hesus, cu a bin pa trece paz y salbacion na mundo henter, ta yena nos cu inspiracion di speransa. Pero cada aña e storia aki por tin un nificacion diferente pa cada un di nos - un storia cu ta recorda nos di e retonan cu ta pone nos na prueba, di momentonan cu ta uni nos, y di lesnan cu ta forma ken nos ta como ciudadano, famia y nacion.
E aña 2025 tabata un aña asina. Un aña cu a move nos como hende profundamente - cu alegria y cu tristesa, cu orguyo y cu reflexion. El a recorda nos con interconecta nos ta, riba e isla chikito aki cu ta nos cas. Aña aki tabatin momentonan cu a toca nos tur. Apenas e aña a habri, y ya caba Aruba a keda confronta cu e perdida di un estadista di nos pais, un gran figura politico kende a sirbi e pueblo na diferente ocasion como Minister President. Aruba henter tabata di luto, y historia lo keda recorda nos di e union durante su despedida.
Despues, nos a conoce mas tragedianan caminda hobennan a perde nan bida, tanto riba lama como riba tera, y cu a marca nos. Laga e trahedianan aki no dividi nos, sino guia nos na e cambionan cu ainda ta necesario - pa nos por ta un sociedad cu ta brinda espacio pa confiansa renace, pa husticia prevalece, y caminda e sentido di seguridad ta recorda nos cu e isla aki ta nos cas.
Nos a bisa ayo tambe, na un gran figura cultural hopi stima, cu tabata y lo keda un tesoro pa Aruba - un musico cu su canticanan y melodianan a sa di refleha e ritmo di e curason di nos isla. Su musica, no tabata solamente pa entretenimento: Su canticanan ta conta nos historia - di nos custumbernan, di nos sentido di humor, pero tambe di nos lucha y di nos soño. El a recorda nos ken nos ta. El a sa di vocifera y transmiti loke nos no por a expresa cu palabra so. Y su mensahe y su vos a surpasa nos fronteranan y a pone nomber di Aruba resona internacionalmente.
Aunke e no t’ey mas cu nos, su legado ta sigui biba den ritmo di nos bida cotidiano, den e orguyo cu nos tin pa nos herencia, y den e union cu su musica a inspira. Nos ta sinti un gratitud inmenso p’e, y pa tur esnan cu ta usa nan talento pa cultiva y preserva e alma di Aruba - nos cultura, nos identidad y nos memoria colectivo.
Den e cosnan mas impactante cu a tuma luga e aña aki mi no por keda sin menciona e logronan sin igual di nos ciudadanonan, speciamente nos hoben deportista, manera nos hungadonan di baseball di little league - a mustra nos un cos fundamental: na final di cuenta, nos ta keda un solo pueblo, uni pa e mesun balornan, e mes recuerdonan y e mes speransa.
E Storia di Pasco tambe ta inspira nos speransa pa mas cu dos mil aña caba - e storia di un baby cu a nace den humildad, cu a trece lus na un mundo cu tabatin mester di pas. E storia di Hesus ta corda nos cu lus no ta bini di poder ni di rikeza, sino di humildad, di compasion y di fe. E mesun lus cu a guia e cuidadornan di carne hopi tempo pasa, ta sigui briya awe - den tur acto di bondad, den tur palabra di pordon, den tur momento cu nos ta scohe pa comprension en bes di husga un otro.
E nacemento di Hesus ta mustra nos cu grandesa por nace for di humildad, cu renobacion por cuminsa den e lugarnan di mas intransigente, y cu e berdadero poder ta bini di stimacion pa bo prohimo. Den e spirito ey, laga nos mira e lus di Betlehem no solamente como un simbolo di fe, sino como un yamada pa accion - pa trece lus caminda tin scuridad, pa trece comprension caminda tin division, y pa trece bondad caminda tin curason cansa y carga.
Mescos cu e momentonan cu mas a impacta nos isla e aña aki, e mensahe di Pasco ta un yamada pa e tempo cu nos ta bibando aden: pa nos transforma reflexion den accion, nos compasion den husticia pa tur y pa nos union bira e fundeshi di un miho mañan.
Pueblo stima, Mientras nos ta reuni cu nos sernan keri den e dianan aki di Pasco y Aña Nobo, laga nos tuma e lesnan di e aña aki cu ta cabando - e balor cu cada un bida tin, e poder di compasion, y e fortalesa cu ta biba den nos comunidad ora cu e ta uni.
Cu e lus di e tempo sagrado aki por briya den cada hogar y cada curason, guia nos pa un aña nobo yena di pas, di comprension y di compromiso renoba. Di parti di mi casa Hanneke y di mi yiunan, mi ta desea tur hende un Pasco bendiciona y un aña nobo prospero. Cu Dios bendishona boso, y cu Dios bendishona nos Aruba tan stima.
E potret ta cortesia di: Kabinet Gouverneur Aruba.
