ORANJESTAD (AAN) – Directora di Departamento di Inspeccion Tecnico (DTI), señora Richella Dorothal, a duna di conoce na DIARIO,
cu pa haci peticion pa pone luz riba caminda mester cumpli cu e siguiente proceso:
Mester busca un formulario di peticion na DTI (DTI aanvraag formulier) y yena tur e datonan personal di e peticionario, manera telefon, email address, e localidad unda ta haciendo e peticion pa luz y e motibo, pa seguridad, visibilidad, etc.
Tambe mester wak si tin un palo di luz den e cercania di e localidad mester tuma e numbernan aki, loke ta bira esencial pa haci e peticion. “Esaki ta haci’e mas facil pa nos realiza e parti di inspeccion. Tambe por añadi potret si ta desea esaki. Si ta trata di un vecindario completo, por añadi e firmanan di esnan cu ta parti di e bario tambe, y cu ta desea esaki” Dorothal a splica.
El a agrega cu tambe mester menciona e motibo pakico ta haci e peticion di luz. Tambe mester indica si e tereno ta erfpachat of eigendom. Pues, tur e informacionnan cu por wordo duna ta esencial pa asina DTI por procesa e peticion mas lihe posible.
Despues di esaki por entregue via email of na bali na DTI, pa e peticion wordo registra na DTI. Por haci peticion pa e formulario aki via e email of personal na bali. Despues cu e wordo entrega DTI ta haci un reconocimento y un ambtenaar ta bay haci un onderzoek pa wak si ta necesario pa pone un luz na unda e peticion a wordo haci. Despues di esaki DTI ta manda conseho pa ricibi aprobacion di gobierno, p’asina por manda e opdracht pa ELMAR vooruit e peticion aki.
